Un felis djárason pa nos lektornan...

E reunion ku mester a tuma lugá entre AMAK, Fundashon JAG i AGKK no a tuma lugá ayera nochi...

Segun informashon ku ma risibí, parse ku niun hende no a blo na e reunion...

Esaki tabata di antisipá, pasó ta difísil pa AGKK sigur bai drenta niun akuerdo ku AMAK riba e tema aki sabiendo ku su miembronan no ta di akuerdo ku e ponensia...

Ayera nos a splika sufisiente riba e tema aki pa loke ta trata animashon durante di Marchanan di Karnaval...

Te hasta serka e muchanan, nan tambe ke variashon...

Na Aruba e rueda di prensa di Ofisina di Turismo ku AMAK a bai super bon...

E reakshon na Aruba tabata tremendo pa e festival i ta ser antisipá ku e aña aki lo logra di superá e kantidat di 600 bishitante ku tabata un averahe durante dje último añanan...

Ray Lauffer a biaha huntu ku e delegashon di AMAK, siendo e promé finalista di aña pasá...

Parse ku pa motibu di trabou Luwi Jano no por a bai...

Buleria a toka na final dje rueda di prensa i Ray a presentá ku nan kousa un lokura total ...

Durante dje bishita na Aruba AMAK i Minister Alcalá-Wallé a reuní ku Minister di Kultura di Aruba Ruiz Maduro...

A sondia te hasta e posibilidat pa bandanan di Kòrsou presentá durante dje popular ‘Fakkel Optocht’ i di otro banda pa bandanan di Aruba i gruponan di Karnaval di Aruba partisipá den nos Marcha di despedida...

Tin tur indikashon ku djabièrnè awor AMAK lo tene un rueda di prensa kaminda nan lo presentá nan partnernan pa Festival di Tumba 2019...

Ma komprondé ku Shon Jenny tin algun kontrakt pa firma ainda ...

I e banda di Boneiru, Fenty, ta pendiente pa partisipá na Festival di Tumba 2019...

Nan lo tene un rueda di prensa mayan na Boneiru pa nan anunsiá nan partisipashon...

E siman aki ta tur atenshon ta pa Inskripshon di Festival di Tumba...

Djasabra ta fecha pa e elekshon di embahadornan di Bándabou...

Pa otro siman JAG tin tur tres elekshon di embahadornan di Karnaval na rei, un tras di otro riba djabièrnè, djasabra i djadumingu...

E karchinan pa Parada di Baiskel ku Lus di dia 16 di febrüari ta na benta...

E evento aki tin tur ingrediente bai bira e kick pa temporada di Karnaval 2019...

EXTRA awe ta kuminsá ku su promoshon pa loke ta trata nos transmishon di djadumingu awor di Inskripshon di Festival di Tumba 2019...

Aña pasá e produkshon aki a risibí bon komentario di krítikonan ku a sigui e transmishon i e alkanse ku e transmishon tabatin tantu na Ulanda i na otro partinan di Mundu a pone ku e tim di EXTRA Digital a bolbe hinka un tremendo transmishon den otro...

Nos partner TDS ta sòru pa e produkshon keda transmití riba kanal 75 i kanal 76 HD...

I EXTRA di su banda ta pone e transmishon riba tur su plataformanan...

Pues djadumingu awor, for di 12.30 di mèrdia, bo por sigui Festival di Tumba for di unda ku bo ta, sea na kas via di TDS òf ku kualke telefòn, tablet, kòmpiuter òf ‘smart tv’ via di nos página di facebook, kanal di YouTube i wèpsait www.extra-v2.mystagingwebsite.com

Djòin nos djadumingu mèrdia i biba henter e ambiente di Inskripshon di Festival di Tumba na e manera úniko ku EXTRA lo bai presentá esaki...

Djabièrnè nos lo duna algun detaye adishonal di nos transmishon pa dje forma ei abo por forma bo ‘Bembe’ unda ku bo ta den sintonia di e korant # 1, EXTRA...

Keda pendiente tambe pa nos tradishonal kampaña di Rei ken ta nos Rei di Tumba 2019 i su promé finalista...

E tremendo kampaña aki ta sòru pa algun aña kaba pa e ganadó risibí un premio grandi ku ta hasi posibel pa e huntu ku 10 persona mas por disfrutá di Karnaval ku un pakete di konsumo kompletu...

Keda pendiente pa e aviso ku abo lo mester yena bo faborito pa Rei di Tumba i su promé finalista...

Awe nos ta kompartí algun potrèt di eventonan di Karnaval ku a tuma lugá kaba, no ta tur dia bo tin chèns pa pone tur e potrètnan ku a keda saká dor di nos fotógrafonan...

Esun ku su potrèt a keda saká ta keda pendiente pa wak ki dia su potrèt ta den korant i awe ta un dje dianan ku nos ta kompartí algun dje potrètnan aki ku bo...

Bon tabata un plaser di por a produsí otro edishon di e kolumna karnavalesko ‘Louie Louie’...