Un felis djabièrnè pa tur nos lektornan...

Desishon a kai ku ta bai hasi adaptashon na algun kaminda riba Jan Noorduynweg pa dje forma ei fasilitá e moveshon di trailernan pa marchanan di Karnaval...

Promé tabatin e pensamentu pa laga gruponan bai para riba Winston Churchillweg i F.D. Rooseveltweg, pero djei a deshasí dje idea ei...

E splikashon ku ‘Louie Louie’ a risibí ta indiká ku tur vehíkulo lo mester subi Jan Noorduynweg for di e rotònde di Julianadorp, pues di IFE/ Universidat bin pariba...

E vehíkulonan lo para, e promé parti di e krusada di Rooseveltweg/ Jan Noorduynweg te ku na e krusada di Brazilweg i Schonegevelstraat...

E área entre Brazilweg i Juan Hatoweg lo keda liber di vehíkulo...

Lo usa e área aki segun e marcha kuminsá move pa vehíkulonan ku yega lat lo por djòin nan grupo einan...

Mi ta pendiente pa tende kiko lo bai hasi ku e edifisionan ku no ta den kondishon pa keda den e estado ku nan tin aworakí...

A duna doñonan chèns pa hasi reparashon, pero si nan no hasi nada, kiko awor? ...

Awe nochi te intenshon pa e kontrol di iluminashon riba e ruta di karnaval tuma lugá...

Aqualectra su intenshon ta pa hasi tur reparashon ku ta nesesario i kaminda tin mester lo pone iluminashon aserka...

Digicel su kampaña ku premio pa gruponan i tambe esnan para kantu di kaya ta otro idea genial pa e koló kòrá resaltá...

Mañan ta fecha pa e elekshon di Reina, Prens i Pancho hubenil i adulto na Bándabou...

Manera nos a pidi, nos ta spera ku pueblo di Bándabou ta duna oido i sostené FKBB ku nan evento...

Mi ta gosando kon e último añanan e desaroyo di retnan sosial i kon nos artistanan lokal ta hasi bon uso pa sea promové nan mes pa ku Festival di Tumba...

Tin dje músikonan ku te asta tin un tim promoshonal ku ta pèrkurá pa tur kos pa nan...

Algun di nan te asta ta logra pa yega na spònser ku ta kubri i pèrkurá pa tur material di promoshon pa nan...

Merkadeo ta yuda bende bo mes i ta sòru pa popularisá bo mes...

Esaki ta presis loke un artista tin mester...

Manera den pasado na vários okashon nos a yega di trese dilanti, partisipashon na Festival di Tumba no ta djis un ko’i gana di partisipá mas, e ta un invershon ku bo ta hasi pa bo éksito di futuro...

Si bo logra di haña spònser e ta yuda pa bo paga bo invershon ku bo a hasi...

Partisipashon na Festival di Tumba ta un negoshi serio...

Awe tardi AMAK lo tene su di dos rueda di prensa relashoná ku Festival di Tumba...

Pa awe tur partner lo bira konosí i nan lo duna último detaye pa loke ta trata inskripshon pa Festival di Tumba ku lo tuma lugá djadumingu awor!...

Pa djadumingu awor EXTRA su tim ta kla pa bai brinda tur e ‘Extravidentenan’ un tremendo produkshon...

E tim di produkshon a traha pa surpasá e loke ku a logra aña pasá...

Na Boneiru ayera nochi a tuma lugá e rueda di prensa di Fenty Music, e banda Boneriano ku lo partisipá na Festival di Tumba 2019...

E banda lo partisipá na Festival di Tumba di Kòrsou i tambe na Boneiru...

Faysel Francisco e lider musikal a indiká ku ta trabou duru tin ta tumando lugá...

Nan lo kompañá Lady Lava i Danny Yanga ...

Nos a komprondé ku Danny ta kompositor di ámbos tumba...

Faysel Francisco a areglá e tumba di Lady Lava i Darrel ‘Titi’ de Palm a areglá e tumba di Danny Yanga...

Mi tin un informashon relashoná ku un kaso di Karnaval ku nos ta laga nan trata di resolvé, promé ku nos divulgá esaki...

E intenshon no ta pa nos pone e situashon den prensa i podisé stroba ku lo por solushoná e problema aki ...

Un kos ta sigur, e kaso tin di aber ku mantenshon di òrdu públiko i mester keda solushoná sigur promé ku marchanan di Karnaval...

Mi ta warda wak si djaluna ta asina leu ku e situashon a keda resolvé...

Ta parse ku niun banda lo no ta partisipando te na e momentunan aki den e Karnaval di Bándabou...

Niun grupo ku tin banda no a konfirmá nan partisipashon na Karnaval di Bándabou i tin banda ku tin pensá pa duna nan músikonan 1 dia pa deskansá i ku nan lo no partisipá na Karnaval di Bándabou...

Bispu di Gran Marcha tin un evento grandi pendiente pa tuma lugá...

Reunionnan ta tumando lugá pa logra harma un tremendo evento riba Rooseveltweg ku partisipashon di sigur 3 banda popular di Kòrsou...

Segun ‘Louie Louie’ por a komprondé ku promotornan dje evento lo ke no solamente hasi algu, pero lo ke atraé un públiko grandi den un área di Rooseveltweg kaminda segun nan idea nan lo ke rekreá e ambiente di ántes den Roodeweg...

Plannan ta basta leu i nos ta pendiente pa manera esaki wòrdu konfirmá pa nos kompartí esaki ...

Bon tabata un plaser i te mañan ku Dios ke !...