Un felis djasabra pa nos lektornan...

Ayera tardi AMAK a tene un rueda di prensa pa duna último detayenan pa loke ta trata e preparashon pa Festival di Tumba 2019...

Ta resultá ku ainda nan no ta kla ku partnernan pa e evento...

E spònser grandinan e aña aki ta mané slou i e organisashon ta pendiente pa algun spònser kategoria ‘Silver’...

Sobrá informashon ku e organisashon a duna ta detayenan tradishonal pa loke ta trata e inskripshon di Festival di Tumba ku ta tuma lugá mañan...

Na momentu di e parti di pregunta koleganan di Televishon Direct a kuestioná AMAK riba e echo ku nan no a haña derechi pa por ‘stream’ e Festival...

A surgi un interkambio di ponensia entre AMAK i e 2 representantenan dje medio di komunikashon...

‘Louie Louie’ a tuma e desishon di bandoná e rueda di prensa despues ku nos a tuma nota ku e interkambio a bira algu ku ta na mesa esaki mester a keda reglá entre e dos partinan...

Un danki di kurason na sra. Ivy Coffy i famia pa e tremendo gesto ku nan a hasi djaweps atardi na e personal di EXTRA...

Sra. Ivy ta e ganadó dje kampaña 2018 di ‘Rei ken ta sali Rei di Tumba 2018’...

Aña pasa ora ku Ivy a gana su premio tabata un pakete ko’i kome i bebe pa 10 persona por selebrá Karnaval...

Djaweps atardi Ivy a bin ku su famia pa yama danki i a hasi entrega di un ‘mug’ na nos i a trese un trit pa henter e personal di EXTRA...

Ivy i famia masha danki, e salada di galiña tabata tremendo!...

Ma komprondé ku Reinier Lijfrock a tuma e desishon ku e no ta partisipá e aña aki na Festival di Tumba, pero ku e ta bai Aruba pa partisipá den e Festival di Caiso na Aruba...

Segun mi ta promé biaha ku un kantante di Kòrsou ta partisipá na e Festival ku ta skohe e piesa pa marcha riba dje durante di Karnaval na Aruba...

Mañan te dia! EXTRA mañan ta transmití e inskripshon pa Festival di Tumba 2019 ...

For di 12.30 di mèrdia nos lo kuminsá nos transmishon i ta pendiente pa brinda e ‘Extravidentenan’ un transmishon variá kaminda lo bo disfrutá i keda bon informá di tur loke ta akontesé den Festival Center...

E tim forma pa 3 biaha Rei di Tumba, Tico Balentien, Sue-Ellen Cijntje i Luis Curiel lo sòru pa entretené bu fo’i mèrdia te anochi 8 or momentu ku ta plania pa e transmishon terminá...

Si bo ta na kas, bo por sigui e transmishon via di kanalnan 75 i 76HD di TDS...

Aserka si bo ta riba moveshon, bo por sigui e transmishon via di e página di facebook di EXTRA ku ta: extracuracao...

Meskos riba e wèpsait di EXTRA: www.extra-v2.mystagingwebsite.com i riba e kanal di YouTube di EXTRA ku ta extracuracao...

Djòin nos djadumingu fo’i mèrdia pa disfrutá di nos transmishon...

Tumba t’aki e ta biba!

Nos ta topa mañan den Festival Center...