Un bon siman na tur nos lektornan...

Ayera EXTRA a skor un biaha mas ku tremendo transmishon di Inskripshon di Festival di Tumba 2019...

Ounke ku nos a primintí ku nos lo a pasa e transmishon riba kanalnan 75 i 76 di TDS, pa motibu di un problema tékniko esaki no por a tuma lugá...

Esaki no a kita ku nos a risibí tremendo reakshon pa e produkshon ku a keda hasi i ku a konta ku riba 10 mil siguidó riba facebook i un kantidat respetá riba Youtube i nos website www.extra-v2.mystagingwebsite.com...

‘Louie Louie’ sigur ta super satisfecho pa e sistema kon e tim a funshoná ayera durante dje transmishon, pabien!...

Pa loke ta trata e inskripshon mes, 22 agrupashon musikal a inskribí pa kompaña 57 tumba...

Ku eksepshon di 2 partisipante ku mi tin duda den nan partisipashon, e sobra ta hendenan ku ya den pasado a yega di partisipá na Festival di Tumba...

Tin tumberonan ku ayera durante di entrevista a indiká ku nan ta kla kaba i ta kestion di sigui ensayá 1 siman mas pa nan presentá nan tumba, di otro banda tin algun ku a duna e impreshon ku ni kuminsá nan no a kuminsá pasa nan tumba...

E aña aki tin 6 eks Rei di Tumba den kontienda, entre nan algun ku lo ta buskando moda di gana e título pa di 4 okashon...

Great pa tuma nota di kantantenan hóben ku ta partisipando, loke ta nifiká ku e relevo pa Festival di Tumba tei...

Ma hari ora ku Maarten Schakel a indiká ku despues di 5 aña su papiamentu a drecha i e ta kla pa bolbe partisipá...

Tin algun tumba ku títulonan masha kopioso i chistoso...

Papiando di inskripshon nos no por keda sin menshoná e situashon ku a presentá kaminda 2 banda a skohe mesun number i fecha di presentashon ...

E kambio ku a keda hasi pa evitá e sistema digital, no a kambia nada pa loke ta aparishon di bandanan, esaki paso a duna e bandanan popular tòg e oportunidat di kai den numbernan mas lat den anochi...

Esei ta hasi e asuntu meskos si ta digital òf via di 2 vas ku ta separá popular for di ménos popular...

By the way mi tin e impreshon ku tabatin un bruashon tambe den e vasnan un dado momentu...

Pero ta loke ku miembronan pidi i aseptá den e reunion general ta loke ku e direktiva tin di kumpli kuné...

15 dama kompitiendo den Festival di Tumba e aña aki...

Tata i yu den Festival di Tumba ku Urvin i Thallysa partisipando...

E kombinashon di Tune/ G- Spot ta kompaña 4 dama...

Doña Elia Isenia, Hendrik de Windt i Ike Jesurun ta 3 eks Reina i Reinan di Tumba ku ta regresá bek komo partisipante...

Nan a wanta i tabata kompetí komo kompositor, e aña aki nan tei bek...

Tico ‘Benoni’ Balentien a indiká ayera durante di transmishon di EXTRA ku e ta pendiente pa partisipá otro aña na Festival di Tumba...

E echo ku otro aña ta 50 aniversario di Festival di Tumba tin hopi hende ku mesun idea ta kana rònt...

Bryan Goilo a indiká ku 2 aña tras di otro ela gana e premio pa Tumba Chistoso, awèl e aña aki e ta sigui kompetí den e kategoria ei...

Tyeisha su último aña partisipando na Festival di Tumba, esaki debí ku e ta bai kontinuá ku su estudio na Ulanda...

Nos tei sigui analisá e lista di inskripshon i lo bini ku mas detaye durante di e siman aki...

Fo’i djawe mas ta e músikonan ku lo ta yegando for di Venezuela pa dje forma ei reforsá e sekshon di brass pa bandanan lokal...

Por último, djasabra anochi tabatin elekshon di Reina, Prens i Pancho di Bandabou, nos ta pendiente pa risibí e resultado pa nos publiká esaki, keda pendiente pa mayan nos duna kobertura na e elekshon di embahadornan di Bandabou...

Bon tabata un plaser, kurpa ta un tiki kansa, pero nos ta satisfecho ku un biaha mas EXTRA a demostrá ku nos por produsí transmishon di eventonan na nivel pa nos ‘Extravidentenan’...

Bon siman!...