Un bon siman pa tur nos lektornan...

E wikènt ku ta tras di lomba tabata trankil pa loke ta trata eventonan...

Skol a start i focus ta kambia mesora...

Nos a drenta e siman di presentashon di ‘Keihard’ di Jandino Asporaat i tambe ‘Caribbean Queen’, e konsierto di Izaline, Shirma i Doña Mafalda...

By the way Shirma a bolbe yena Pietermaai djasabra anochi...

Aserka ta bin e pelea Mayweather kontra di Mc Gregor pa kua tin bastante interes i basta promoshon di parti di diferente sitio kaminda e pelea lo keda pasá pa públiko por wak...

Ma tuma nota ku nos representante pa Miss Universe, Nashaira Balentien ta moviendo masha hopi mes...

Ayera ma mira un foto kaminda e tabata invitado na e sertámen di Miss Guyana ku a tuma lugá e wikènt aki...

‘Rumba Band’ a pone un piesa promoshonal riba merkado titulá ‘Sin Bo’...

‘Sin Bo’ ta piesa original di Kassav ku a keda adaptá pa Jamz i ta keda interpretá pa Heidi...

Un pabien pa Liesella Thomas ku den kabamentu di siman pasá a kontraé matrimonio...

Liesella masha pabien na abo i Raitel Geertruida...

Djabièrnè anochi Bradley a pone yen hende kuminsá manda felisitashon pa Ramil, pasó presentamentu el a kasa...

Djasabra atardi nos a topa Ramil i manera nos a puntr’é riba e kaso aki, el a kuminsá hari i indiká ku ta liber el a pidi pa e por a bai toka na un kasamentu, anto Bradley kende a remplas’é na trabou a hasi di henter e asuntu un ‘joke’ poné risibí masha hopi mensahe mes di felisitashon...

E popular komediante merikano, Jerry Lewis, 91 aña, a fayesé ayera...

AGKK ta kontentu ku porfin a duna eksonerashon pa por importá material pa Karnaval...

Henny Reinilla den un komunikado ku el a manda ta mustra ku ta for di 2005 AGKK ta mandando karta pa tur e Ministernan di Finansa ku a sinta, pero ta awó numa parlamento ta aseptá e proposishon...

E splikashon kiko e gruponan mester hasi pa bin na remarke ta bai bira e siguiente punto ku Henny ta bai atendé pa e gruponan...

Otro siman djaluna lo bira fecha ku Gobièrnu lo anunsiá ta ken lo ta e organisadó di Karnaval 2018 i 2019...

A prolongá e oportunidat pa gruponan interesá inskribí nan mes...

Ban spera ku e kantidat di organisashon a bira mas ku 3...

Tin gruponan ta birando mas grandi i esei ta pone ku mester di mas banda pa animá i tambe mas ekipo di zonido...

Den siman tras di lomba ma kombersá ku un persona na kabes di un dje kompanianan di zonido na Kòrsou i el a indiká ku ya kaba nan a sinta na mesa pa konta spiker pa dje forma ei sa presis ta kuantu grupo nan lo por ‘support’ ku zonido den 2018...

Sèptèmber ta pendiente pa bira e luna kaminda vários grupo di Karnaval lo bai presentá nan trahe di Karnaval...

Nos tei move, siman a habri, ban traha pa progreso di nos Pais...

Te djárason ku Dios ke!...