Ensayonan a sigui kue forma i awe mayoria músiko ta yegando for di Venezuela pa dje forma ei reforsá e agrupashonnan musikal lokal...

For di djárason awor lo tin algun agrupashon musikal ku lo ta repasando nan tumbanan ku sekshon di brass kompletu...

E invershon ku bandanan ta hasi pa zona grandi ku un sekshon di brass ta un gastu formal...

Pasashi, estadia, outo i kuminda ta forma parti dje pakete, sin lubidá ku kada tumbero ku nan kompaña tin un pago inkluí...

Ta p’esei tin banda ta sera dil ku otro banda pa nan kompartí e gastunan...

Karnaval di Bándabou durante di wikènt ku ta tras di lomba a tene nan elekshon di embahadornan di Karnaval...

Awe nos a duna kobertura na esaki, pero mester remarká ku tur 2 elekshon a start lat...

Elekshon Hubenil konforme informashon ku mi a risibí a start 2 ora lat i a bin kaba te den kareda di 10 or di anochi, loke a pone ku esun adulto a kuminsá lat i kaba te den oranan lat di mardugá...

Fanátikonan ku a bai pa presensiá e elekshon di adulto mester a keda para pafó ta warda esun hubenil kaba, pa nan saka tur hende promé ku nan por a drenta paden...

Great pa tuma nota ku a invitá Rei di Tumba Hubenil pa e hasi un presentashon durante dje elekshon hubenil na Bándabou...

Esaki ta e meta i e motibu pa kual a kambia e fecha di Festival di Tumba Hubenil, mester trata na mantené esaki tempran pa duna e hóbennan oportunidat pa por disfrutá i gosa dje tumba ganadó...

Pa e fin di siman aki lo tin elekshon di Rei i Reina Tiner riba djabièrnè, djasabra ta Reina, Prens i Pancho Adulto i djadumingu den Sambil lo tin e elekshon di embahadornan hubenil...

E elekshon di djabièrnè i djasabra ta tuma lugá riba Kleine Werf na Carnival Village i esun di djadumingu den Sambil lo ta grátis...

Aña pasá e elekshon hubenil a pèrkurá pa e área di ‘food court’ di Sambil tabata kompletamente yen...

Promoshon pa ‘Bikes with Lights Parade’ tambe a kuminsá i e espektativa ta grandi pa esaki...

Ma komprondé ku dia 16 di febrüari lo ta e fecha pa kuminsá harma stellage riba ruta di Karnaval i no e siman promé...

Ayera ma komprondé ku e interes for di Aruba pa bin presensia Festival di Tumba ta basta grandi, benta di karchi na Aruba ta kanando masha bon mes i esei ta un indikashon ku kos tei bira bon!...

Trabounan riba e lanthùis na Festival Center ta tumando lugá...

Djadumingu ma mira algun parti dje lanthùis ku ta kla kaba ku huntu ku e skrinnan di LED lo bira e diseño kompletu dje tarima pa Festival di Tumba...

Ta un arte pa bo ta kreativo pa por logra pa tur aña superá e diseño dje aña anterior pa loke ta trata stage di Festival di Tumba...

Awe nos tin un vershon kòrtiku di ‘Louie Louie’...

Mañan nos ta sigui ku e kobertura normal...

Felis dia!...