Un felis djaweps...

Mei mei di tur e akshonnan sindikal ku tin ta tumando lugá, preparashon pa e diferente aktividatnan di Karnaval ta sigui tuma lugá...

Ayera tardi nos a topa Juni Aniceta i Lisette Jansen na momentu ku nan a kaba di sali reunion ku Kuerpo Polisial...

Reunionnan di preparashon ta tumando lugá semanalmente i esei ta pèrkurá pa tur partner di Karnaval ta bon informá...

Ayera nochi ‘Louie Louie’ a bishitá 2 ensayo, di Gentz Tre’Chic i Icons by Gio...

Nos ta yegando wikènt i bandanan ta kuminsá ku e trayekto final di kaba di harma e tumbanan ku inkorporashon di sekshon di brass...

Na Festival Center tambe preparashon ta tumando lugá...

Ayera nos por a tuma nota ku a pone e dak dje lanthùis riba stage i awor ta e detayenan parti abou dje lanthùis mester kuminsá instalá, pa djasabra ta e intenshon pa stage ta kla...

Ayera nochi tabatin otro tremendo edishon di ‘Rumba pa Tumba’ ku Glenn Thomas...

Liber pa Liber, Glenn te mihó animadó pa loke ta trata Festival di Tumba...

Ayera nochi mes bo por a tuma nota ku no ta nos aki na Kòrsou so ta siguiendo Glenn pero e tin su públiko na Aruba, Boneiru, Ulanda, St. Maarten i te asta Miami kaminda tin yunan di Kòrsou residensiá...

Sigui tur e tres dianan preliminar di Festival di Tumba pa dje forma ei bo skohe bo faboritonan i yena e formulario relashoná ku e kampaña ‘Rei ken ta Rei òf Reina di Tumba 2019’...

E pakete komo premio dje kampaña aki ta grandi i bon pa bo selebrá Karnaval ku un grupo di 10 persona...

Mi ta pendiente pa haña un reakshon di e gruponan ku a hasi promoshon internashonal pa logra atrae partisipantenan pa nan grupo di Karnaval for di otro islanan i Ulanda...

Tin hende ku tur aña ta bini pa partisipá, pero e aña aki ma tuma nota ku tin basta promoshon a keda hasi riba e otro islanan i Ulanda pa atraé partisipante...

Na Aruba e selebrashon di 65 aniversario di Karnaval ta mustra ku e kantidat di partisipantenan pa Karnaval lo bai subi...

For di Kòrsou tin basta un par di hende ku ta bai Aruba pa e selebrashon aki i tin ku te asta ta partisipá den e gruponan...

Obra di man ta tene man, pero manera siman di tumba pasa, sedenan di gruponan ta kue ‘overdrive’ pa asina kaba e trahenan i dekorashon di trailer i sobra atributonan ku ta pertenesé na e trahenan...

Nos tei move, te mañan ku Dios ke !....