Un felis djabièrnè pa tur nos lektornan...

Nos a yega e wikènt di elekshon di embahadornan pa Karnaval 2019...

Awe djabièrnè i djasabra ta riba Kleine Werf i djadumingu ta den Sambil kaminda entrada ta grátis...

Aña pasá, e promé aña ku a organisá e elekshon hubenil na Sambil, e food court a resultá chikí pa e kantidat di hende ku a bai Sambil pa presensiá e elekshon...

E organisashon ta pendiente pa e aña aki atrobe e elekshon atraé un públiko grandi...

E wikènt aki tambe ta esun kaminda ensayonan di Tumba ta kue forma ku sekshon di brass...

Ta awor bo tei sinti e dushi di e tumba i mesora faboritonan ta kuminsá wòrdu anunsiá...

Djadumingu ta e tradishonal ensayo habri kaminda bandanan ta pone zonido grandi pa laga tumba zona pa nan sinti e vibrashon dje tumba...

AMAK ayera nochi a tene un rueda di prensa kaminda nan a duna último detaye pa loke ta trata e siman di Festival di Tumba ku ta kuminsá djaluna awor...

Feco ta entusiasmá i huntu ku su direktiva i kolaboradornan ta trahando duru pa tur kos ta na òrdu pa djaluna awor...

Lo tin kara nobo den hurado, asina nos a keda informá...

Parse ku mester a manda algun hende ku penshun pa dje forma ei supla un airu fresku den e hurado...

E stage ku e lanthùis riba dje ta impreshonante...

Ayera nochi nos a logra mira e parti djabou i segun splikashon ainda falta un pida mas ku kombiná ku led screen lo bira algu di otro mundu...

Jimmy i su tim di Massive ta hasiendo un trabou grandi ku e proyekto aki...

Ser kreativo pa un evento grandi manera Festival di Tumba ta masha importante...

E kombinashon di dekor, lus, led screen i efektonan spesial mester kontribuí na e ‘wauw effect’ pa e públiko i esnan ku ta sigui e transmishon na kas...

Importante ta pa abo ku no a kumpra bo karchi pa e Festival ainda, pa bo hasi esaki i yuda sostené nos músikonan lokal...

Ayera nochi Feco a indiká un biaha mas ku benta di ‘Pay Per View’ ta kanando bon i mesun interes tin pa ‘streaming’...

Lo ta interesante pa sa te na unda tin hende ku lo aboná pa e servisio di ‘streaming’...

Nos ta spekulá, pero tin yu di Kòrsou ku ta bibando na paisnan basta leu i ku ta sigui tur dia tur kos ku ta tuma lugá aki na Kòrsou...

E siguidónan di e wèpsait di EXTRA mes ta un ehèmpel, ta basta hende no solamente na Ulanda, pero na diferente parti di e planeta aki ku ta aboná riba nos wèpsait...

Gruponan di Karnaval ta trahando fullswing pa nan ta kla na ora...

E timnan ku ta traha riba karosa tambe ta preparando pa nan kuminsá traha...

Tin grupo ku ta warda Festival di Tumba kaba pa nan por kai den ‘overdrive’...

E asuntu di kùrmentu di vehíkulonan ku ta partisipá den e diferente marchanan di Karnaval a kuminsá tarda un tiki di mas...

Tin yen di proposishon riba mesa, a papia te hasta di bai kùr na keuringsloklaal, pero awó ta resultá ku parse ta e tim bieu mes lo ta esun enkargá pa bai kùr e vehíkulonan...

Loke ta mas importante ta ku e mester pone fecha definitivo pa kùr, bo tarda, aweró bo ta hinka e grupo den pèrtá si e tin ku hasi reparashon pa bolbe bai kùr...

AGKK i JAG mester pone preshon pa e kùrmentu tuma lugá mas lihé posibel...

Tin un bai bin pa loke ta trata dunamentu di pèrmit pa un evento di Karnaval, promé a bisa si, awor ke bisa no, pero tin un plan pa kon lo por bisa si tòg na final, pero tanten ta tardando pa tuma desishon riba esaki...

Mi’n tende kon a bai ku e paseo pa kontrolá ruta di Karnaval riba iluminashon...

E hendenan di Aqualectra a primintí ku tur kaminda ku mester di iluminashon lo keda debidamente ‘sende sende’ pa loke ta trata lus...

Coromoto College su tema pa Karnaval ta korantnan lokal, awèl nan tin praktikamente tur korant pa nan por traha trahenan di Karnaval...

Hopi kreativo bo mester ta pa traha un trahe ku e mucha por jump kuné i alabes bo ta hasi promoshon pa e medionan di komunikashon...

Bon pa nos tabata un plaser, nos ta topa riba Kleine Werf i djadumingu, nos tei pone tempu pa bai riba un paranda di ensayo di tumba pa tende ken tur ta bon prepará pa Festival di Tumba 2019...

Bo mes sa, otro siman ‘Louie Louie’ lo ta den  Festival Center pa dje forma ei duna bu tur detaye i komentario pa loke ta trata e di 49 edishon di FT 2019...

Felis wikènt!...