Un felis djárason...

Awe ta bispu di Dia di San Valentino, yen hende pendiente pa regla un regalitu pa nan amistat pa mañan...

‘Juan 7 Porta’ tin problema, ta hopi regalo e tin ku kumpra i kore repartí...

Ayera nochi a tuma lugá e entrega di premio di Festival di Tumba 2019...

Bon ambiente tabatin na Sambil, públiko a aploudí kada un dje finalistanan i naturalmente e Rei di Tumba 2019...

Feco tabata kontentu ayera i a indiká mesora ku djabièrnè awor trabou ta start pa e selebrashon grandi di 50 aniversario di Festival di Tumba...

En bèrdat nan tin ku start tempran pa dje forma ei nan logra sera e partnernan pa e Festival for di tempran...

Nan mester traha tambe riba un tim di músiko ku ta bai traha riba formashon di un orkesta pa kompañá,  manera a yega di sosodé den pasado, kantantenan ku no logra haña un banda pa kompañá nan den Festival di Tumba...

Nos ta premirá ku lo kai chikí na banda òf e fenómeno di banda ku praktikamente mesun músikonan lo presentá bou di 2 nòmber...

Awe nochi tin reunion di gruponan ku ta partisipá na Marcha di Kabai...

E reunion ta tuma lugá na Rancho de Herberg serka Stanley Ignacio...

Johnny Brazao, un dje mihó dj-nan di Kòrsou den dékada 80 a bai deskansá...

Kondolensia na su famianan ku e pèrdida...

Johnny definitivamente tabata un dje grandinan den dékada 80...

E reunion ayera nochi di AGKK i Fundashon JAG ku lidernan di grupo i shofùrnan di vehíkulonan ku ta partisipá den Karnaval a bai bon...

Ounke no tur lider tabata presente, por a nota si interes di shofùrnan ku a bin tuma informashon riba e manera ku lo posishoná vehíkulonan riba Jan Noorduynweg...

Huntu ku AGKK i JAG tabatin funshonarionan di otro departamentonan di Gobièrnu, manera Polis ku a duna informashon i splikashon...

Ayera nochi tabatin un ‘vrum vrum’ ku un areglista i un kompositor lo tabatin problema ku otro, esaki despues di resultado di Festival di Tumba...

Hende ta un kos inkomprendibel, te hasta ora kos ta bon entre e 2 personanan, mester buska tòg algu pa trese un papiamentu riba algu ku no ta kuadra ètòl!...

Ayera EXTRA a sostené un entrevista ku Dibo Doran i djasabra awor esaki lo keda publiká den e páginanan semanal di ‘Djasabra’ den korant EXTRA...

Ma gosa ayera pa mira kon e 3 areglistanan ku a gana premio pa mihó areglo, kon nan ta kompartí ku otro i saka potrèt...

E festival ta un kompetensia, pero e amistat ta e kos di mas importante...

Un saludo pa George Walle, ayera George tabata enkargá pa tuma premio pa tur hende ku no a yega na ora òf no tabata presente na entrega di premio...

Kompader tin relashon ku diferente banda, loke ta hasié e promé opshon pa representá kualke músiko òf kantante...

Wikènt aki tin 2 tremendo jump in riba djabièrnè, esun di MCB i e otro di SVB...

Djadumingu ta fecha pa ‘Love Music & Festival’ na Matheywerf na Otrobanda...

Ma tuma nota ayera nochi ku na New York, pa ser eksakto na Genesee Community College kaminda tin un kantidat di studiante yu Kòrsou ta sigui nan estudio tabatin henter un ambiente durante dje final di Festival di Tumba 2019...

Potrètnan ku a keda kompartí pa e College a indiká ku e hóbennan a prepará henter un ambiente i a sigui e transmishon dje final via televishon...

Great pa bo tuma nota ku no ta importá unda bo ta riba e mundu aki, e interes tei pa sigui e evento musikal mas grandi i importante di Kòrsou...

Djasabra awor ta fecha pa pone stellage riba ruta di Karnaval...

Por kuminsá ku konstrukshon pa 10 or di mainta...

Djadumingu 10 di mart ta último dia pa bo kita bo stellage...

Bon nos tei move, nos a kompartí basta informashon awe...

Felis dia!...