Ya nos a yega djaweps, e siman ta manera bula masha lihé mes...

Un felis dia di San Valentino, un dia di amistat i amor...

Spera awe ku Cupido lo sa di flecha e hendenan ku porshon grandi di amor...

Awe nos ta pendiente pa bai Landhuis Brakkeput Mei Mei pa bai disfrutá di e konsierto baliabel di Juni i Arnell huntu ku ‘The Bolero Legends’...

Ma komprondé ku Ced Ride i Libia Frans lo ta entre otro e sorpresanan di anochi...

Ayera Dibo Doran a saka e vershon pa radio di e tumba ganadó ‘Kòrsou ta den su Gloria’...

Nan a yam’é e ‘official track’ i e tin su motibu...

Nan a drenta den studio di grabashon i a bolbe balansá e tumba ganadó ku a keda presentá djabièrnè anochi...

E echo ku Dibo a gana e título ta yuda e banda ONE tambe, e promoshon ta yuda e banda pa despues di temporada di Karnaval nan por haña presentashon regular...

Festival di Tumba ta keda un ‘business card’ pa kualke agrupashon musikal, sea bo ta logra òf dobla warda numa...

E impreshon ku bo ta duna durante di Festival di Tumba ta masha importante pa e aktividatnan farandulero durante dje aña ...

Mi ta gosando kon e aseptashon di Dibo ta tumando lugá i kon diferente empresa ta invit’é pa pasa serka nan, entre otro na Dolphin Academy...

Sin lubidá e kompanianan manera Digicel i Tui kaminda e ta embahador, pa nan tambe e ta un tremendo stunt promoshonal...

Te ainda e lista ofisial di Gran Marcha i sobra marchanan no a sali...

Tin 2 lista den sirkulashon, pero AGKK ni JAG no a saka e lista ku lo mester ser konsiderá komo e lista ofisial...

Algu ku mi a nota riba e listanan no ofisial ta e echo ku e gruponan ‘Internashonal’ a risibí number normal, siendo ku den pasado tabata duna e gruponan e numbernan dilanti...

Ta e grupo di Colombia i Orishas de Cuba so tin number normal manera kualke grupo...

E orario ofisial di salida di e diferente marchanan tambe a keda publiká...

Mi ta den espektativa pa wak kon ta bai ku e parada di baiskel ku lus ta bai djasabra awor...

E kombinashon ku motosaikelnan ta bai hasi e parada mas great ainda, sigur si bo a mira kon e motosaikelnan a organisá un ‘tour’ den fin di aña anochi kaminda motosaikelnan ku a partisipá a wòrdu iluminá...

Awe i mañan si bo ta miembro di TDS, bo tin chèns di kumpra bo karchi di e evento ‘Love, Music & Food Festival’ i risibí 1 karchi grátis...

Chèk e artíkulo ku a sali awe den ‘Louie Louie’ pa mas informashon...

Ta interesante pa wak kon e públiko ta bai komportá e aña aki ku bishita na e diferente ‘jump in’ ku ta keda organisá...

Kuminsando for dje wikènt aki e ‘jump in’ tradishonal ta bai start i pa e próksimo 2 siman lo tin un sin fin di aktividat...

E públiko mané kustumber ta skohe kua nan ta bai i tin un grupo tambe ku a spar pa bai tur i no ke pèrdè niun...

Situashon ekonómiko ta wantá, pero e hendenan ta den goso total ku nan Karnaval...

Ma tende ku tin un organisashon no a keda masha kontentu ku un chèk ku resientemente a keda otorgá na organisashonnan di Karnaval...

Tabatin un organisashon ku segun su pensamentu ta e mester a haña e chèk i no kos partí manera ‘pòrkchòp mitar mitar’...

E organisashon ku a hasi e donashon a disidí bou di niun kondishon ta duna e chèk na solamente un organisashon, mester repartí e sèn ku a keda rekoudá ku otro organisashonnan...

Ma komprondé tambe ku tin un situashon ku asuntu di ‘branding’ o mihó bisá propaganda kantu di ruta...

Parse ku ta e intenshon pa kontrolá esaki mas skèrpi pa buska moda di saka mas entrada for di esaki...

Awó mi ta kòrda ku den pasado a yega di bisa ku si bo hasi promoshon pa un produkto ku bo pago di prekario lo ta un otro montante...

Mayoria hende ta warda pa den e siman di Karnaval dekorá i pone propaganda di spònsernan ku a yuda ku nan stellage...

Ta e or’ei lo mester kontrolá pa bai kobra pa esaki...

E ta un situashon difísil, pasó ta kon bo ta bin kobra un gastu èkstra, pasó e hende a paga kaba...

Mi no sa si e lei di prekario pa Karnaval ta permití pa kobra èkstra...

Henter e preparashon di Dome ta kohiendo forma...

Tin algun idea planiá ku Dome pa e aña aki ku mi no sa si nan ta bai logra...

Pa e fin di siman aki si mi no ta ekiboká karchinan pa Dome lo subi merkado...

Ma komprondé ku Dome lo tin un largura di 30 meter ámbos banda di kaya...

E konsepto pa atraé turista pa sinta wak Karnaval na e sitio mester ta e prioridat number 1, ounke mester menshoná ku tin hopi yu di Kòrsou ku ta hasi uso dje fasilidat pa sinta einan wak Karnaval ...

E públiko lokal mes ta sostené Dome bon...

Bon nos tei move, un felis dia di San Valentino un biaha mas...

E amistat sinsero tambe mester wòrdu honrá riba e dia di awe...

A sobra Rosa kòrá? Mi mester mester pasa buska un par pa mi parti awe...

Felis dia !...