I nos a yega djaweps...

Ayera tardi ‘Louie Louie’ a bai Festival Center un ratu pa mira e trabounan ku ta tumando lugá den Festival Center...

E tim di Hak’e ta hasiendo un tremendo trabou i ta praktikamente kla ku e set up ...

Pará den Festival Center mi ta topa 2 otro kolega di medionan di komunikashon i nos ta kuminsá papia riba e kambio ku bo ta mira for di ora bo ta pafó di Festival Center i ora bo bin paden bo ta keda impreshoná pa e kambio ku dekor ta duna na e sentro...

Ta manera ma skibi den siman aki, AMAK mester tuma e konsepto di Hak’e i adaptá esaki pa Festival di Tumba 2020...

Duna e lugá un ‘facelift’ sigur ta habri wowo i pone ku e públiko ta haña kaminda pa Festival Center...

Mi ta spera ku tur supladó ku tabata pendiente pa bin Kòrsou pa reforsá bandanan pa Karnaval a yega, pasó e blokeo lo trese mesun situashon ku tabatin aña pasá ...

Kumpra pasashi pa laga e músiko biaha pa Colombia pa djei kue buelo ku Avianca bin Kòrsou ta hasi e gastu pa e banda mas karu...

Awor si no tin moda di hasi ta di invertí den esaki numa...

Nos a tuma nota ku Izaline Calister ta na Kòrsou pa dje forma ei ensayá ku e orkesta di Randal Corsen pa su presentashon mañan djabièrnè riba e promé anochi di Hak’e...

Ayera nochi Izaline i Farley Lourens tabata na ensayo di RCO i Farley a kompartí su potrèt ku nos...

Meskos ku e añanan anterior, bandanan ta tuma nan presentashon na Hak’e na serio, ei bo ta skor òf basha awa ku bo presentashon...

Ayera nochi a kuminsá pone dranghek riba e último parti di ruta di Karnaval...

Ma komprondé ku ta e intenshon pa pone dranghek for di Cubaweg pa final di marcha...

E otro drangheknan lo mester ta riba werf na Nieuwe Haven, pero debí na e akshon di empleadonan públiko, nan no por a wòrdu saká ainda...

Ban spera ku ta logra saka nan promé ku fin di siman...

Tin un tiramentu di palabra entre dos animadó di radio ku ta kohiendo un rumbo no muchu bunita...

E echo ku esun a kita djòp dje otro den un evento resientemente a pone ku tin e ‘beef’ aki...

Miembronan di gruponan di Karnaval tin lidernan di sierto gruponan man na kabes...

E asuntu ku prikichi no ta yega na ora tin lidernan kanando rònt ku mashin pa kontrolá preshon...

Mi no sa kon tei para ku e akshonnan ku ta tumando lugá, pero Gobièrnu mester tin un plan B, dado kaso e akshon sigui i no tin sufisiente Polis pa traha durante marchanan di Karnaval...

Djasabra awor tin tambe e ‘Nos ku Nos’ Carnaval Party na Brakkeput Mei Mei...

Rhydd’m, Happy Peanuts i Future Band ta enkargá ku animashon...

Karchi ta optenibel na Mensing’s Caminada.

Ayera tardi sra. Ruthsella Senior a bin tuma su premio ku el a gana den e kampaña di EXTRA...

Ruthsella a keda masha kontentu...

Pa nos di EXTRA ta un plaser pa tuma nota ora ku ganadó di un di nos kampañanan keda kontentu ku su premio...

Esei te meta, hasi algu ku ta keda apresiá...

Mañan lo mi anunsiá un tremendo entrevista ku nos lo publiká pa djasabra awor...

EXTRA ta sigui traha riba kosnan great pa nos lektornan i esnan ku ta sigui nos riba nos plataforma digital...

Bon tabata un plaser, nos tei move...

Djabièrnè ta na kaminda, pero promé ku esei ban laborá awe pa hiba nos Pais pa dilanti !...