Un felis djabièrnè na tur nos lektornan...

Mayan djasabra manera ma indiká lo tin un tremendo entrevista ku Randal Corsen...

E direktor musikal i lider di Randal Corsen Orchestra a kòmbersá ku Valesca Diaz spesial pa e edishon di ‘Djasabra’ ku ta sali den EXTRA...

E entrevista lo ta disponibel tambe riba e página di facebook extracuracao i riba YouTube extracuracao tambe...

Awe nochi kos tei bira bon den Festival Center...

E promé anochi di Hak’e ta primintí di bira un tremendo tributo pa Tumba i Festival di Tumba...

E músikonan ku lo presentá mañan mes ta bastante entusiasmá i no papia mes dje eks Rei i Reinanan di Tumbanan ku lo tin ku presentá...

Ayera nochi ‘E he he’ tabatin nan tradishonal ‘ban topa’ ku presentashon di e banda ku lo bai kompañá nan den Gran Marcha...

Manera ta konosí nan a indiká ku ta Tune lo kompañá e grupo, pero ayera nochi ma komprondé ku e banda yama Tune, pero e músikonan ta e músikonan di G Spot/ Tune ku a presentá den Festival di Tumba...

Ray i Dibo a pone bon ambiente ku nan presentashon spesial pa ‘E he he’ ayera nochi...

Great ku ta duna e hóbennan chèns di bai ku un grupo di karnaval grandi kaminda nan tin e responsabilidat musikal pa e grupo...

Awó nan tin ku ensayá serio pa por hasi un bon presentashon den Gran Marcha...

Ora siman bòltu mi tin un bon notisia pa bo...

E grupo grandi di yunan di Kòrsou residensiá na Ulanda a kuminsá yega Kòrsou pa selebrashon di Karnaval...

Tin di nan a skohe entre bin pa fin di aña òf bin pa Karnaval...

Ora e temporada ta kòrtiku bo tin chèns ku nan ta skohe pa bin nèt den fin di aña i keda mesora pa Festival di Tumba...

Meskos ku tin ta bini Kòrsou, tin otronan ku ta biba aki i ku ta skohe pa bai Aruba òf Trinidad pa selebrá Karnaval...

Aruba e aña aki ta selebrando nan di 65 aniversario di Karnaval...

Pa nos otro aña ta bai bira importante pa aki na Kòrsou tin un selebrashon di kita sombré...

Great pa tuma nota ku Fundashon JAG ta logra di haña un partner mas pa Karnaval i sigur pa premio pa Grupo di Aña...

Premiashon di gruponan ta masha importante ...

Informashon di fiesta di Sergio Vargas i Rubby Perez a sali awe, ya hendenan a kuminsá wak kalènder pa marka fecha...

Awe nochi tin jump up di skolnan tambe, tin algun skol ku tin jump up tradishonal riba e djabièrnè promé ku marcha hubenil...

E dianan aki parti anochi bo tin ku praktikamente evitá e ruta di Karnaval, paso ta masha hende mes ta Sali kaya pa bai keiru i wak stellage...

Tráfiko sigur den e área di Palu Blanku i Marchena ta pega formal...

Kòrda ora bo ta den tráfiko i bo ta riba ruta di Karnaval pa tene kuenta ku e drangheknan ta riba kaya...

Na Sta. Helena e kaminda dòbel ta bira 1, debí ku dranghek ta riba kaya, pues kore outo ku koutela i si bo tin purá, kore rònt evitá e ruta di Karnaval...

Bon nos tei move, awe ta promé anochi di Hak’e, awe tin jump up di skolnan anochi tempran, pues tin kaminda pa bai...

Felis dia!...