Un bon siman pa tur nos lektornan...

Hak’e ta tras di lomba, masha bon reakshon mes pa e evento...

Tantu djabièrnè ku e homenahe na nos Rei i Reinanan di Tumba...

I di djasabra no papia mes, ‘sold out’, un ambiente úniko ku públiko gosando tur afó...

Bandanan a impreshoná ku nan presentashon, pero ta keda tòg e desishon dje repertorio ku bo ta bai toka i e sekuensia di piesanan ku bo ta bai presentá...

Esaki ta masha importante pa bo impaktá e públiko fo’i kuminsamentu di bo presentashon...

Pabien na e organisadónan, si e aña aki mes a bai asin’aki pa otro aña e selebrashon di 5 aniversario dje evento lo ta un ku lo mester surpasá tur espektativa di baidónan di Hak’e...

Un bon Marcha Hubenil ...

Ounke el a sali un tiki lat, pero e gruponan a duna bon presentashon...

Gruponan kolorido i algun hopi bon akabá...

Ta di lamentá ainda ku tin 1 pa 2 grupo ku no ta riba e nivel ku ta deseá pa un grupo forma parti di Marcha Hubenil...

Loke ta bira riparabel mesora ta e echo ku ta pasa un grupo di nivel i su tras ta sigui un dje gruponan ku no tabata na e nivel ku ta spera...

Mi no ta bai menshoná nòmber, pasó no tin mester, tur hende a mira, e petishon ta bai na Fundashon JAG pa nan por duna un man i yuda e gruponan aki...

Na AGKK tambe e petishon pa yuda alsa e nivel di gruponan chikí...

Nos predikashi anual di skrudiñá delantá promé ku gruponan partisipá mi ta kere no ta nesesario mas...

E ta mané un disko raya!...

Muzik tabata bon, tur banda i dj a zona bon kaminda Louie Louie a wak Karnaval...

E tumba ‘Soldat’ di Sontje tambe a zona ku regularidat...

Loke si ta di lamentá ta e gruponan ku ta varia ku Roadfire i ta usa nèt esnan ku letra no ta un ehèmpel...

Nos mester kòrda riba nos norma i balor, anto ta fo’i chikí ta eduká muchanan...

E marcha a kana bon, algun kaminda iluminashon a laga di deseá òf no tabatin mes...

Ta di lamentá ku esaki a sosodé, pasó Aqualectra a pasa henter e ruta i a inspekshoná iluminashon...

Ta kon bin no a pèrkurá pa e iluminashon tabata sufisiente òf pa sikiera e iluminashon di kaya ta na òrdu...

Ban spera ku ta kontrolá esaki awe pa djabièrnè awor pa tur kos ta okidoki...

E marcha a kaba den kareda di 7.30pm, loke ta mei ora promé ku e orario stipulá den e pèrmit...

E siman GRANDI di Karnaval ta kuminsá awe...

Fo’i awe nochi te otro siman djamars ta ambiente tur dia...

Awe nochi ta SOAB, mañan ta Kleine Werf, djárason ta BAB/ Crazy Diamonds den Emmastad i djaweps nos ta riba kaya ku e Jump Up di Radio Mas/ ViseVèrsa...

Bon mi tei move, siman a habri, tin trabou, ban traha pa nos hiba Kòrsou dilanti !...