Djamars, awe ta fecha pa Zjangilae riba Kleine Werf...

Pero promé ku esei, ayera nochi ambiente tabata tremendo den Kura di Arte kaminda SOAB i Frater Aurelio a organisá nan tradishonal jump in e aña aki...

Rich Pieter ta keda un kantante sumamente gustá bou di públiko...

Despues di algun aña ainda e Oloshi ta pone e públiko ariba abou...

Den kurá di DIGICEL tambe na Biesheuvel tabatin tremendo ambiente ku ONE...

E banda a pone bon ambiente i públiko a gosa un bòl...

E siman di jump in a start bon ayera nochi i ta pendiente pa awe esun di Zjangilae...

Ma tuma nota dje Jump In ku e programa ‘Dune un Chens’ ta organisá mañan pa e muchanan di skol spesial avansá Marieta Alberto...

Hopi great Antonietta, hasi bon i bon ta bini pa bo...

E idea den kuadro di selebrashon di 15 aniversario di su programa ta algu di aploudí...

Konosiendo kon Antonietta ta organisá su aktividatnan, e muchanan lo bai pasa bon sigur...

Ma komprondé ku Gobièrnu a gana e kaso kontra dje persona ku tabatin un kantidat basta grandi di dranghek wardá bou di kondishon...

E persona kende a hasi uso di loke ta ser yamá ‘retentie recht’ a pèrdè e kaso den korte ...

Esaki a pone ku djadumingu i ayera djaluna tabata dia di trabou pa logra saka tur dranghek for di kaminda esakinan tabata wardá pa dje forma ei den siman aki mes instalá esakinan...

Manera ‘Louie Louie’ a splika for di inisio dje temporada di Karnaval ku e intenshon ta e aña aki pa instalá dranghek for di Cubaweg te final di marcha...

Ban spera ku awor Gobièrnu buska un kaminda adekuá pa por warda e drangheknan aki ...

Ma tende di un grupo ku tabatin un kantidat grandi di miembro ku no a kaba di paga pa nan trahe, nan a tuma e desishon di kuminsá bende e trahenan ku e hendenan ku ta riba ‘wachtlijst’...

E situashon aki sigur lo pone algun karnavalista ku podisé a warda pa ora nan kobra paga nan trahe man na kabes...

A duna tur chèns pa e prikichi yega, pero parse ku esaki no a tuma lugá...

Awe nochi ta kuminsá ku instalashon di DOME riba Rooseveltweg na altura di Samira...

Mi no a risibí e orario presis, pero tene kuenta ku esaki debí ku nan lo sera kaya i ta te ora kaba ku subimentu dje dak ku lo habri kaya bèk...

Djasabra awor EXTRA lo ta na DOME meskos ku aña pasá nos a transmití for dje sitio un programa di televishon riba nos plataformanan digital i tambe via di TDS...

E aña aki lo ta mesun kos, pues keda pendiente pa djasabra awor for di 7 or di anochi bo sigui e transmishon karga ku ambiente, informashon i tur loke ku bo ke sa promé ku Gran Marcha 2019...

Bon nos tei move, un felis dia ...