Un felis djabièrnè na tur nos lektornan...

Nos a yega e wikènt di selebrashon di Karnaval na Kòrsou...

Un total di 20 grupo ta partisipando e aña aki den Parada di Tiner, entre nan tin kombinashon di 3 grupo den 1...

1606 partisipante lo tin den e Parada di Tiner 2019...

E gruponan a amplia loke ta great, loke mester subi ta e kantidat di partisipantenan...

Pa djadumingu tin 23 grupo, anto esaki sin konta gruponan ku ta den kombinashon ku otro pa motibu di muzik, pues gruponan ABCDE...

Si konta tur grupo riba nan kurpa nos tin un Gran Marcha ku 27 grupo, 2 individual i animashon di un grupo di brasbènt ku tambe a keda registrá komo grupo...

Grupo Vise Versa pa 2019 ta e grupo di mas grandi ku 750 partisipante...

9 grupo ta surpasá 200 miembro i riba 300 tin 3 grupo...

Kasi 4400 hende lo partisipá djadumingu awor na Gran Marcha...

E kantidat segun mi a subi un tiki, pero ta keda drai den e mesun kantidat di partisipante mas o ménos pa algun aña kaba...

Pa otro aña, e selebrashon di 50 aniversario di Karnaval e organisashon ku lo keda enkargá pa organisá Karnaval mester traha riba un konsepto pa atraé mas partisipante den Karnaval...

Nos mester trata na yega 5000 partisipante...

Pa mi kue un ehèmpel, e ‘Fakkel optocht’ di Aruba e aña aki a atraé 11.000 partisipante, anto ku 8 grupo so, si mi no ta ekiboká...

Viva i Estreno mas Pikete ta e 2 gruponan ku ta usa mas ku 1 banda pa animá nan grupo, miéntras tin algun grupo ta hasi e kombinashon di dj i banda pa animá nan grupo...

Kantu di Kaya e pueblo ta gosa, un biba kompletu fo’i mainta tempran kuminsando ku sòpi i sigui bai...

Tin stellage kaminda famia ta pasa henter un dia, ku un sin fin di ko’i kome i bebe...

Great pa mira ayera nochi kon e gruponan di skolnan di pariba nan Jump Up a kana...

Basta mucha riba kaya ta jump bou di guia di dosente i mayornan...

Awe parti mainta lo tin selebrashon di Karnaval na diferente skolnan lokal...

Tin ta mantené den kura di skol i otronan ta organisá jump up sea den bario òf ku un ruta kaminda diferente skol ta partisipá...

Mayan djasabra ta kabes pabou, ban sostené Karnaval di Bandabou ku e aña aki ta selebrando nan di 50 aniversario...

Wak pa bo ta na Barber tempran, seramentu di kaya ta kuminsá for di 12’or di mèrdia...

Awe te promé anochi di DOME, Parada di Tiner lo wòrdu transmití riba kanal 73 di TDS i tambe riba e plataforma di basilachill...

I no lubidá mayan anochi for di 7’or EXTRA lo tin transmishon bibu dje programa ‘Kant’i Kaya’, spesial pa Bispu di Gran Marcha...

TDS tambe lo transmití ‘Kant’i Kaya’ riba kanal 73...

I dimes e plataforma digital di EXTRA, facebook: extracuracao i YouTube: extracuracao lo transmití ‘Kant’i Kaya’...

Si bo ta riba kaya, no tin problema riba bo telefòn òf tablet tambe bo por sigui e transmishon...

Nos tei move, awe nochi ta Parada di Tiner t’e kos!...

Te mayan ku Dios ke...