Un felis djamars pa tur nos lektornan...

Tremendo tabata e wikènt tras di lomba...

Kòrsou su Karnaval 2019 tabata un bunitesa...

Awe mi no ta bai duna komentario riba kada un dje aktividatnan, pero lo mi reserva esaki pa den siman aki mes mi reakshoná riba kada un...

Komentario tin sigur, tantu esnan positivo,komo  tambe esnan ku a hala atenshon i ku meresé tur atenshon dje organisashon, Gobièrnu i sobra stakeholders nan di Karnaval...

Hopi hende riba pia pa disfrutá di Gran Marcha, e públiko sigur a haña un bon evento mira i nos por ta kontentu ku e gruponan nobo ku a forma parti pa promé biaha e aña aki na nos Karnaval i a hasi impreshon mesora, meskos ta esnan tradishonal ku ta traha pa brinda un bon espektákulo...

E produkto final di Karnaval mester traha riba dje, tin algun manera mas mihó pa hasi promoshon pa spònsernan di grupo ku ta djis pone un outo kore den e marcha i plak algun sticker riba e outo...

Mester kontrolá i bin ku regla pa e kantidat di vehíkulonan den marcha ku tei pa simplemente hasi promoshon den e marcha...

Na mi konsepto nan ta baha e kalidat dje presentashon di gruponan...

Anto no ta nos so ta tuma nota di esaki...

Mi tabata para banda di un stènt kaminda tabatin algun turista i nan a hasi mesun remarke, ‘ki mishi e outo ei den e marcha’...

Ma gosa ku Fundashon JAG a para un ratu dilanti di Marchena Hardware durante di Gran Marcha pa duna atenshon un ratu na Thomas ‘Boy’ Martina dfm, un persona ku semper a duna su aporte na Karnaval di Kòrsou...

Meskos djasabra anochi, ora ku nan a sorprendé Fifi Rademaker ku un rekuerdo pa e echo ku a dediká Karnaval 2019 na su persona...

Pa awe nochi ta spera muchu mas tantu hende kantu di kaya pa Despedida di Gran Marcha...

Mirando e komportashon di públiko i e reakshon ku Kuerpo Polisial a duna ayera durante di nan rueda di prensa, nos ta spera ku públiko lo sa di komportá su mes i ku miembronan di Kuerpo Polisial tambe lo ta tolerante...

Tur hende ta sali kas pa bai disfrutá, si bo tin otro idea, please keda kas wak Karnaval na televishon...

No bin kaya ku e idea pa buska problema òf regla kuenta ku niun hende...

E solo echo ku a detené 2 persona djabièrnè anochi ku ‘bulletproof vest’ i arma, ya ta duna bu un impreshon bon kla ku tin hende ta sali kas ku mente maligno...

Karnaval ta un evento masha grandi, kaminda un kantidat hopi grandi di nos poblashon ta sali kas ku e meta pa bai wak...

Si e meta di Ofisina di Turismo i Gobièrnu di Kòrsou ta pa nos por internashonalisá nos Karnaval, nos komo pueblo tambe mester kontribuí na esaki...

E grupo grandi ta komportá, pero ta algun hende ta komportá malu i esaki ta daña kos!...

Ayera nochi e Parada di Tiner a sali demasiado lat, loke a pone ku Kuerpo Polisial a tuma e desishon ku ta para e marcha pa 12’or di anochi, esaki sin tene na konsiderashon unda e marcha ta...

Bo mes tin ku komprondé ku Polisnan tambe ta trahando for di mèrdia i ta mesun grupo a keda pa kubri tur 2 marcha...

Pa awe disfrutá i gosa di e marcha di Despedida, mayan nos tei bek ku e último edishon di ‘Louie Louie’ den Karnaval 2019...

Felis dia...