Un felis djárason...

Karnaval ta tras di lomba, despedida a tuma lugá ayera i awor kuaresma a kuminsá...

Pa e karnavalistanan trabou ta start mesora, paso e temporada di 2020 lo ta un kòrtiku si bo tuma na konsiderashon ku Gran Marcha 2020 lo ta riba 23 di febrüari 2020...

Pa e organisashon ku lo risibí e enkargo pa organisá Karnaval ,e trabou lo ta un ku mester start mesora...

Selebrashon di 50 aña mester ta bon organisá...

Nos tur ta na altura di loke no a bai bon e aña aki i mester traha riba dje pa otro aña esaki keda hasi mas mihó...

Gruponan di Karnaval fuera di nan kompromisonan ku nan miembronan, mester duna nan granito pa Marchanan sali na ora pa nos tin un presentashon di kita sombré...

E proseso pa sigui internashonalisá nos Karnaval mester kontinuá...

Mester bin un kordinashon entre e organisadónan di Karnaval i Ofisina di Turismo...

Un evaluashon di kua te aktividatnan ku tin ku keda organisá i no djis organisá aktividatnan paso ta un kustumber...

Karnaval di Bandabou mester wòrdu evaluá, e loke a pasa e aña aki ta e ‘dieptepunt’ pa e Fundashon...

No ta falta dje Fundashon den sierto sentido, pero ta falta di interes dje pueblo di Bandabou mes segun mi...

Tantu e elekshonnan komo e Karnaval di Bandabou riba su mes a bai atras i esaki mester keda evaluá...

Falta di fondo ta pone ku bo no por kumpli ku sierto di bo idea òf plannan, p’e motibu ei mes mester evaluá i keda ‘dos pia riba tera’...

Pa Bandabou e evento ku mester sigui sin pensa 2 biaha te ‘Marcha di Skolnan’ riba djabièrnè,  e evento aki mester sigui i mester sòru pa e tur kos pe muchanan ta regla, manera entre otro e transporte i konsumo...

Pa bo tin 2940 hóben den un Marcha di Skol ta algu grandi i e meresé tur atenshon...

Gobièrnu mester sali mas pronto posibel indiká ku tin un destaho públiko pa organisá Karnaval 2020 i pone sèn èkstra riba e 350 mil tradishonal...

Òf Gobièrnu mester yega na un kombenio ku tur su kompanianan priva ku nan lo duna aporte pa selebrashon di 50 aña di Karnaval i tambe Festival di Tumba...

Dje forma ei bo ta garantisá ku ámbos evento grandi di selebrashon di Karnaval lo start sin niun dolor di kabes...

Mayan lo mi tei bek ku análisis riba algun dje eventonan importante pa Karnaval...

Un felis dia pa bo!...