Un bon siman pa tur nos lektornan...

Kon a bai ke wikènt...

Kuaresma a start pero tòg mester konstatá ku nos hendenan ta sali kas pa dibertí...

Tin biaha bo tin e impreshon ku e hendenan no ta sali, pero riba kaya djasabra anochi bo ta tuma nota ku lugánan ta bon bishita...

Basta hende ta probechá bai restorant bai kome...

Un pabien ta Radio Hoyer ku ayera a kumpli nan di 65 aniversario...

Masha hopi hende mes a asistí na e selebrashon ku a tuma lugá na Hòfi Fidel...

Mi ta kere ku nos mester amplia e lista di premiashon di Karnaval pa otro aña...

E echo ku mas i mas bo ta hañando piesanan individual den e marcha ta na su lugá pa duna un premio, loke lo kontribuí ku mas hende lo partisipá ku un piesa individual...

Otro premiashon ku tambe mester keda inkluí i esaki mi ta wak den direkshon di AMAK ta premio pa e 3 mihó bandanan den Gran Marcha i Marcha di Despedida...

Ounke na final di anochi lo tin diskushon tòg, pero loke nos bandanan ta hasiendo sigur ta un espektákulo riba nan mes...

Tur banda ta pèrkurá pa nan tin un presentashon i nos mester por balorá esaki ku un premio...

Mester bin ku kriteria i laga un hurado kapasitá hasi e evaluashon di presentashon di bandanan...

Hasi henter e partisipashon na e marchanan un kompetensia musikal i alto nivel...

Di mes esnan ku no ta riba e nivel, lo sòru pa nan hasi nan bèst pa sikiera nan keda menshoná den e finalistanan...

Meskos ta konta pa djnan ku ta den e diferente marchanan...

Ayera a tuma lugá e inskripshon pa Kantadó Mayo...

80 komposishon no ta wega, tres dia preliminar di mas o ménos 25 komposishon lo pone ku e evento MESTER kuminsá na ora pa kaba na un orario kristian manera nan sa bisa...

E fechanan di Kantadó Mayo a ser kambia di loke ta kustumber...

Nan tabatin e kustumber di kuminsá e promé anochi preliminar riba un djamars i e final riba djasabra, awó a bòltu esaki i e promé anochi preliminar ta riba djaluna, 25 di mart 2019...

Pa djárason awor  lo tin un rueda di prensa kaminda lo bai duna tur detaye relashoná ku e gran fiesta di Seú 2019...

E piesa ‘Run Wid It’ ku a resultá un éksito kompletu pa loke ta trata temporada di Karnaval no solamente na Trinidad, pero ront Karibe ta un kos serio...

Na Aruba ma komprondé ku Polis mester a pidi un banda pa stòp di toka e piesa aki, paso e miembronan di grupo a kue tur barikada kantu di kaya hisa i bai djump ku esaki ...

Algun banda na Kòrsou tambe a toka e piesa aki den Marcha, pero mas komo kick...

Ku un ritmo pegahoso, e ta pone bu move t’e asta sin bo ke...

Mr. Killa a pone Karibe move ku su éksito!...

Nos tei move, djárason ku Dios ke nos tei bek !...

Siman a kuminsa, ban traha pa adelanto di nos dushi Korsou...