Un felis djárason pa tur nos lektornan...

Kuaresma ta den i ya kaba tin algun moveshon tumando lugá pa loke ta trata músikonan...

Tin un músiko ku nan ke ‘bedank’ pa su aporte musikal den un banda, esaki debí ku segun nan kompader a bira grandi pe banda...

Awó ta kon tei kuminsá bisa e músiko esaki...

Djaya banda ma komprondé ku tin un músiko ku tin idea di kologá su spada...

E músiko ku ta ‘role model’ pa loke ta trata dominio di su instrumènt parse tin intenshon di notifiká gerensia di e banda ku e ta forma parti di dje ku e ta bai stòp, pasó rudia a kansa...

Moveshon di bandanan i músikonan for di aworakí pa loke ta trata Karnaval 2020...

E echo ku tin algun grupo ku a stòp, pero ku ta pendiente pa djòin Karnaval 2020 ta pone ku e kantidat di bandanan ta bai bira ménos, loke ta mas kla ku di dia ku tur lider di grupo ku tin banda ke sigurá e banda pa nan partisipashon den Gran Marcha di otro aña...

Kontrakt di Dreams i EMP tambe a terminá i segun e portal digital ‘Veloz’, Axel a skohe pa ‘Hats off to Dreams’, miéntras ku EMP ya tin liña tira riba un otro banda...

Ya ta sigur ku Cache i Grupo Globo tin plannan serio pa presentá den Gran Marcha 2020, ámbos organisashon ta trahando riba esaki i ta pendiente durante transkurso dje aña aki pa informá ofisialmente di nan partisipashon...

Awe ta fecha pa e rueda di prensa di FKSK kaminda nan lo duna tur detaye pa loke ta trata e temporada di Seú 2019...

Tirzo Martha a bira e ganadó dje di 11 galardon di Arte, “Wilhelminaring” na Ulanda...

Djasabra último EXTRA den su korant a pone spòtlait riba Tirzo Martha i su proyekto lokal ‘Instituto Buena Bista’...

Kolega Valesca Diaz a sostené un entrevista ku Tirzo Martha i bo por mira esaki riba e wèpsait di EXTRA i tambe e kanal di YouTube di EXTRA, e kanal di YouTube di EXTRA bo ta busk’é bou di: extracuracao...

Pabien na Tirzo ku e logro...

Tin un situashon entre dos animadó di radio ku den wikènt ku ta tras di lomba a bira un tiki mahos, despues di un publikashon ku a sali riba facebook...

Ta di lamentá ku e dos amigunan aki pa mas ku sigur 30 aña awor na grandi aki tin problema ku otro òf sigur di un banda pa e otro tin problema...

Ata ayera nochi despues di e programa Bai’e a surgi un situashon di reklamo riba esun ku a gana e último outo dje kampaña...

E reklamo ta basa riba e echo ku tin indikashon ku e yabi ku ta habri e outo lo mester a ser poné den e baki di yabinan na un manera ku esun ku hinka por a sinti ku esei ta e yabi debí ku el a keda habrí...

Ban spera ku e asuntu aki ta keda reglá...

Bon nos tei move, te Djabièrnè ku Dios ke !...