Un bon siman pa tur nos lesadónan..

Wikènt tras di lomba tabatin premiashon di Karnaval 2019...

Despues di premiashon semper tin komentario sea riba e resultado òf loke a sosodé durante di premiashon...

Un pabien na tur e gruponan ku a kai den premiashon di tur nos marchanan...

Boso a traha duru pa logra e premio...

Un punto si ku mester atendé ta e kriterionan pa kada kategoria ku ta premia...

E loke ku ‘Louie Louie’ a skibi relashoná ku premionan adishonal ku mester bini pa nos Karnaval, esaki ta hasi e kompetensia tambe mas atraktivo...

E kriterionan pa husga mester ta disponibel pa gruponan di Karnaval...

Esaki ta evitá mal komprondementu i ta evitá tambe e situashon kaminda un òf mas grupo lo por pidi pa no husga nan mes pa loke ta trata premiashon...

Esaki a sosodé e aña aki kaba, kaminda un grupo a pidi ku e no ke pa e kuerpo di hurado husga su presentashon debí ku no por a duna un splikashon kla di e kriterionan pa husga...

Ta pone algun premio ku e grupo mester inskribí su mes den e kategoria ei, si esei no ta e kaso òf si no tin niun grupo ku a inskribí pa e kategoria, mester evaluá promé si e grupo ta kuadra den e kategoria...

Ni maske e so a inskribí pa e kategoria i e no ta kuadra den e kategoria, ta imposibel ku ta sak’é komo ganadó...

Tin un premio ku a keda otorgá na un grupo grandi ku segun mi i algun opservador mas ku no ta kuadra ku loke e grupo a  presentá...

E puntonan aki mester ser atendé ku mas koutela pa evitá mal kontentu...

Mester bin mas premio...

AMAK tambe mester pone premio i skohe un kuerpo di hurado ku no ta liga ku bandanan pa saka e mihó agrupashon musikal durante di marchanan, mihó zonido i mihó presentashon...

Ma keda asombrá ku e asistensia na premiashon di gruponan, ántes bo tabata haña mas hende ta asistí, e wikènt tras di lomba esaki tabata na e kantidat mínimo...

Segun mi si esaki ta e trènt, lo por a usa un otro sitio pa premiashon i spar na gastunan...

Mester evaluá e premiashon di Karnaval den e aspekto aki tambe...

Bo por a haña tur kos grátis, pero si e lugá ta muchu grandi, bo ta keda manera den un bashí...

Awe tardi 6 or gruponan rítmiko ku ta partisipando den Kantadó Mayó tin ku saka nan órden di presentashon ...

Ayera nochi tabatin e apertura di Seú 2019 ku Misa i tambe un presentashon musikal riba Plasa Brion...

Loke ta di apresiá ta e amor ku tin pa nos eventonan kultural...

Ounke kuantu kos tin ta pasando Seú tin su hendenan ku ta sigui biba nos kultura...

Nos tei move, bon siman...

Siman nobo, pa ounke kuantu kontratempu tin, nos mester lanta ku fe, uni i traha pa hiba nos Kòrsou dilanti!...