Un felis djárason...

Ensayonan pa Kantadó Mayó ta den full swing, manera siman bòltu tur atenshon lo ta riba e anochinan preliminar di Kantadó Mayó...

Icons by Gio ta den notisia ketu bai, e banda ta pasando den un momentu di transformashon i nos ta pendiente pa wak ta ki direkshon e banda lo skohe pa bai...

E músikonan ku a tuma e desishon di bandoná e banda ta e base di Gio i rondó di nan lo ke lanta Gio tambe bèk...

Pero ban ser sinsero nos farándula lokal por karga e bandanan aki aworakí? ...

E último añanan nos tabatin sufisiente ehèmpel di situashon kaminda bandanan no por a keda mantené músiko, pasó simplemente si bo konsepto no ta kuadra ku loke e públiko ke aworakí, bo ta keda ensayá sin por toka...

No ta pòrnada por ehèmpel Axel Pikero a skohe pa bai traha den un format mas chikí i na okashon ta reuní e músikonan pa toka den format mas grandi...

Bo wak e otro bandanan ku eksepshon di esnan ku ta toka den kòmbèk, ta un lucha nan ta hiba ...

Ku eksepshon di ERA tur sobrá tin doló di kabes pa mantené nan kabes riba awa...

Te hasta e entertainment band mester ta kreativo pa por sigui presentá tur siman, pa esaki e variashon musikal ta hunga un ròl importante...

No tin niun banda mas ku riba nan ‘SO’ ta yena un diskotèk, e kos ei ta pasado...

Ta ora bo forma un all star band ku diferente kantante òf kombinashon di kantantenan popular bo ta logra esaki ku hopi promoshon i ‘boost’...

E situashon di ‘kartel vorming’ den farándula lokal ta trese kuné tambe ku fásilmente un banda por keda ekskluí di kombinashon, pasó otronan ta uni i tene bu afó...

Promotornan tambe si nan no tin konfiansa ku lo bo por atraé públiko pa nan, lo no pone bu den kombinashon, pasó simplemente bo banda no tin forsa pa hala públiko...

Tin lidernan di banda ku mester ta konstantemente kreativo pa pèrkurá pa nan banda por toka, no solamente toka, pero logra pa e konsepto ku nan ta presentá yena e sitio di presentashon tambe...

Un dje músikonan ku mi tin rèspèt pe pa loke ta trata krea konseptonan nobo i buska e bashí den merkado ta Juni Juliet...

Juni tin asina tantu format di presentashon ku esei ta sòru pa e tin un agènda yená ku presentashon kontinuo...

E konsepto di Legends a dal i no papia mes di Bolero Legends, awor e kombinashon di nan dos ta pendiente pa tuma lugá...

Ambos konsepto ta atraé e públiko di edat ku no tin kaminda pa bai i ta reakshoná positivo riba tipo di fiestanan asin’aki...

Pe aña aki mi ta premirá ku promotornan mester sigui ta kreativo pa presentá konseptonan nobo ku a atraé e públiko, si no logra esaki e públiko ta skohe pa sigui bai presentashon grátis di bandanan di entertainment ku ta toka variá i komplasé e públiko...

Nos tei move, djabièrnè nos tei bèk ku otro edishon di ‘Louie Louie’...