Un felis djabièrnè, wikènt ta start den gran forma aki...

Un wikènt kargá ku aktividat ta loke nos tin...

Awe e final di Kantadó Mayó ta mustra di bai bira elektrisante...

Un final dramátiko, pasó te ainda no tin pa e públiko un ganadó fiho...

Tin algun aña ku bo ta antisipá ken ta esnan ku ta den Tòp 5, pero e aña aki e partisipantenan lo tin ku bende nan kueru karu riba tarima awe nochi den Klup di Shell...

E artistanan a gaba e organisashon di Kantadó Mayó i p’esaki Fundashon Kultural Seú Kòrsou mester ta kontentu ku e rekonosementu aki...

Ban wak si e órden di presentashon lo tin su efekto riba algun dje faboritonan...

Bo presentá den tempran no ta meskos si e públiko ta kayente...

Bo por bisa ku e hurado ta skohe a base di nan kriterianan, pero si e públiko biba ku e presentashon di un kantante, e tin un edge riba un otro ku e públiko a djis sinta wak...

Mañan djasabra ta pendiente pa tuma lugá e parada di baiskel organisá pa Fundashon JAG...

E evento a keda posponé den temporada di Karnaval i mayan ta fecha pa e sigui, korementu di baiskel anochi riba ruta di Karnaval...

Djadumingu ta fecha pa e kompetensia di maramentu di lensu...

Kordinashon dje evento ta den man di Shurendi Pieternella, ta su promé aña i e echo ku el a organisá un tayer pa siña i duna guia na esnan ku a inskribí, el a sòru mesora pa tur hende partisipá na e kompetensia...

Djadumingu amantenan di ambiente kultural ta rumbo pa Hòfi Fidel...

Icons a publiká riba nan página di facebook ku definitivamente ta nan mes ta bai Ulanda ...

Despues ku promotor a indiká ku e tabata ke e grupo di 5 di Gio den e banda, awó kos a bòltu i Icons ta bai ku su formashon nobo...

Mi ta kontentu ku Highway a wanta e lugá pa Brello...

Esaki lo mester ta un ehèmpel pa kualke músiko ku ke bandoná un banda ...

Sòru pa bo tuma bo retiro riba bon entendimentu, pasó si bo hunga ròl di bai rabiá, bo ta keda afó...

E moveshon di Brello pa Icons i awor bèk ku Highway band ta manera e artíkulo ku di Nicolas Cage ku nos a publiká awe...

Nicolas a kasa i despues di 4 dia a pidi hues pa anulá e kasamentu...

Parse ke shon tabata riba sèn i ta despues ku el a kasa el a ripará ke shon ta riba su ‘money’...

Disfrutá di bo wikènt!.