Un bon siman pa tur nos lektornan...

Kon a bai ke wikènt?

Kantadó Mayó a resultá un éksito kompletu pa loke ta trata e kompetensia...

Kompositornan i agrupashonnan rítmiko ta tumando e festival komo algu hopi serio...

Letra na nivel, areglonan tremendo karga ku ambiente i presentashon sublime di kantantenan huntu ku grupo di baile i e kompañamentu musikal ta pèrkurá pa algu úniko...

Na mi pareser djabièrnè último a marka un punto máksimo pa loke ta trata uso di Klup di Shell komo sitio pa organisá e evento...

Si, mi sa ku unda ku a bai purba no a resultá i ku ta den Klup di Shell tin e kayente di Kantadó Mayó, pero a yega e momentu pa ekspandé...

Masha hopi hende a keda sin bai, esaki pa motibu ku nan tabata sa delantá ku e lugá ta bai yena i nan no ke ta den e ambiente pèrtá riba otro...

Esaki a pone ku e sintonia di transmishon di plantanan di televishon tabata haltu...

Hopi hende a sigui e transmishon sea via di televishon òf via di retnan sosial...

E ‘hype’ dje aña aki mester bira motibu pa bin ku un plan pa ekspandé e festival ku ta desaroyando den un forma positivo...

E aseptashon di Sharrel Denisia su ‘Na Pia Me’ ta hopi grandi...

Pa kuminsá ku e gruponan rítmiko ku a manda felisitashon na Grupo Oriri i na e ganadó ta algu di aploudí...

Ayera na e kompetensia di Mara Lensu 2019 ma komprobá kon gusta ‘Na Pia Me’ ta ...

No ta wega, ora ku Sharrel a kuminsá interpretá e piesa e dansflur a yena ku tur tipo di hende, fo’i grandi te chikí, anto e hendenan ya tin e koro dominá, pues ambiente total...

Un pabien na mi amigu, Ludwig Isabella i su tim di Oriri, nan a traha duru durante 3 siman pa logra un resultado fantástiko, 1,2 i 3 den Kantadó Mayó 2019...

Pa bai bèk riba e final di Kantadó Mayó 2019, mi mester indiká ku mi a gosa e seriedat i intensidat di kompetensia di e músikonan...

Hopi esfuerso ta wòrdu hasí i na final di anochi ora viktoria bati na bo porta, bo ta mira e sentimentu di satisfakshon i legria den e kara di e músikonan...

E kompetensia di Mara Lensu 2019 tabata tremendo...

Ta un arte pa bo Mara Lensu manera ma mira ayera, hopi talento i kreatividat bo mester tin ...

E kantidat di partisipante e aña aki a krese signifikantemente, esaki danki na e tayer di Mara Lensu ku Shurendi Pieternella a organisá...

E konsepto aki mester sigui kuné, pa dje forma ei sigui traha riba kontinuidat...

Kultura definitivamente ta biba den nos pueblo, sigur esnan ku ta sigui Seú djaserka...

E hendenan ta den nan mundu ku un goso total...

Otro evento ku a bai masha bon mes e fin di siman aki tabata ‘Duets’ na Avila Beach Hotel...

E duo forma pa Randal Corsen i Dibo Doran a bolbe presentá un proyekto musikal ku éksito...

Un sala yen a disfrutá di nan presentashon...

Nos tei kore, siman a start, ban traha pa adelanto di Kòrsou...