Un felis djárason...

Ayera nochi Gio a start ku nan promé ensayo i yen kara konosí presentá pa ensayá...

E banda pa regla lo mester zona bon pasó nan ta akoplá ku otro kaba, ta kestion di repasá e repertorio ku nan konosé for di kabes djis pa ‘refresh’ e mente...

Ma komprondé ayera tambe ku ya kaba e banda tin plan pa drenta studio di grabashon i un konosido areglista tin algun areglo na su enkargo...

Great pa tuma nota ku nos tin un músiko mas graduá ...

Shandrelica Casper a gradua i awe nos tin un artíkulo riba su graduashon i loke e ta dedikando su mes aktualmente na dje...

Jazz meets Culture ta mustra di bai bira bon e aña aki atrobe ...

E kantidat di músikonan ku ta ser poné huntu pa presentá e tremendo nochi di konsierto aki...

Djasabra awó nan tin Gimmick pa karchi na Licores Maduro...

Courtney djasabra awor ‘The Store’ lo ta e sitio pa benta di karchi ...

Situashon ta pèrèmpèmpèn pa loke ta trata Karnaval ...

Ma komprondé ku situashon finansiero tantu pariba komo pabou a pone ku no a logra di kaba di paga debenan...

Esaki ta trese kuné ku ámbos organisashon ta den un pèrtá...

Ma komprondé si ku ta tratando pa logra paga e debe, algun instansia di Gobièrnu lo mester duna ayudo pa por logra esaki...

Banda di AMAK tambe ma tende ku e situashon ta meskos, einan ponementu di beslag tin e organisashon den sierto sentido strangulá...

Intermediashon di algun persona klave lo mester tuma lugá pa dje forma ei skapa Curaçao Festival Center...

Ta di lamentá ku e situashon aki a presentá siendo ku tabatin un grupo interesá pa kumpra Curaçao Festival Center ...

E grupo te asta a ofresé pa duna AMAK e posibilidat pa sigui organisá Festival di Tumba den e lugá bou di kondishonnan ku ta kumbiní ámbos organisashon...

Ban spera ku pa e situashon aki tambe tin un solushon...

Great pa tuma nota kon diferente empresa a kuminsá mira motibu pa duna aktividatnan kultural atenshon...

E echo ku e festival di Kantadó Mayó e aña aki a resultá un éksito grandi a pone ku tin diferente empresa interesá pa duna sosten na no solamente e Kantadó Mayó, pero tambe na agrupashonnan musikal ku ta partisipá den e Marcha di Seú 2019...

Kultura i Deporte ta dos kos ku meresé nos atenshon aki na Kòrsou...

Na diferente okashon a yega di papia pa pone 1 sèn pa deporte, te hasta por a subi gasolin ku 2 sèn i repartí e entrada entre deporte i kultura...

Mi ta kombensí ku aki na Kòrsou lo no tin problema ku un kontribushon asin’aki...

Nos mester kuminsá un kaminda pa por logra pa sigui mantené nos Kultura bibu i brinda oportunidat na hóbennan ku ke praktiká deporte...

Ku e pensamentu aki nos ta despedí awe...

Djabièrnè ku Dios ke nos tei bek ku otro edishon di ‘Louie Louie’...