Un felis wikènt pa tur nos lektornan...

Awe mi ta kuminsá e kolumna ku un kòmplimènt pa Sharrel Denisia, nos Kantadó Mayó...

Motibu di esaki ta despues ku mi a mira ku el a bishitá Betesda mi a haña mas apresio pe i su tim pasó no ta tur biaha e ganadónan di kualke festival popular ta masha inkliná pa hasi bishita na sentronan di kuido...

Tin ta hasié pero bo ta mira ku ta mandá nan ta òf konsehá pa djis presentá kara, pero loke ma mira ayera ta un hóben ku a bai kana riba e diferente departamentonan ku Betesda tin...

Hopi great e gesto aki Sharrel...

Papiando di Sharrel tin informashon ta sirkulá ku su nòmber ta menshoná den kambio di banda...

Ta di ban wak si Sharrel ta tuma desishon pa djòin un formashon musikal di trayektoria...

Ma papia ku Feco i el a bisa mi ku te ainda e ta sinta warda e 2 gruponan ku tabata interesá pa kumpra Curaçao Festival Center...

Tin un di 3 persona, pero esaki ta riba medio gatia e ta buskando un chèns pa kumpra e lugá...

E kompader aki ta blo pidi pa baha preis...

E dos gruponan promé a bin kombersá, nan a mira e rapòrt di tasashon i lo mester a bini ku un proposishon riba mesa, pero te ainda nada...

E hendenan ta interesá, pero mester por yega na akuerdo pa ku benta i esei no a sosodé ainda...

E wikènt aki tin e evento kulinario na Landhuis Chobolobo, Curaçao Culinair...

Esaki lo ta awe i mañan djasabra...

Mañan ta fecha pa e konsierto di Kadir Snijder i amigunan na Misa di Montaña...

Mañan i djadumingu ta fecha pa e konsierto di Kor Guadalupana den ouditorio di Banko Sentral...

Mañan anochi tin elekshon di Reina Seú na Boca Samí, evento ku ta mustra di bai hala basta públiko...

Un dje eventonan e luna aki ku ta mustra di bai hala basta hende ta e konsierto di Shirma Rouse Soul Kitchen – Curaçao Edition...

Esaki lo tuma lugá riba dianan 21 i 22 di aprel próksimo na Villa Maria...

Amantenan di músika Soul sigur lo skohe pa bai presensiá e tremendo konsierto aki...

Músiko ku a distansiá su mes for di un banda, awor tin bèrgwensa pa regresá...

Dia di bai, ba duna komentario, awó bo ke bin bèk, bo no tin kara ni karakter pa pidi despensa pa bo palabranan...

Basta aktividat den luna di aprel aki, no lubidá ku tin siman di Curaçao International Film Festival Rotterdam ku tambe ta amantenan di pelíkula disfrutá di un siman ku pelíkula ...

Ya banderanan di International Blueseas Festival ta dòrna e área di Pietermaai...

E evento musikal te kousa impakto atrobe den e área di Pietermaai i atraé un kantidat grandi di públiko...

Blueseas ta pendiente pa tuma lugá durante dje wikènt di 19 i 20 di aprel próksimo, dos dia di músika den Pietermaai...

Disfrutá di bo wikènt, diferente aktividat pa bo por sali kas i bai dibertí...

Nos ta topa Djaluna ku Dios ke !...