Un bon siman na tur nos lektornan...

Kon a bai ke wikènt? ...

Diferente aktividat ku hala bon públiko...

Un dje eventonan sosial ku a atraé bon públiko durante di wikènt tabata e evento organisá na Landhuis Chobolobo, Curaçao Culinair...

Bon públiko i mas ku tur kos tremendo presentashon kulinario di e diferente restorantnan ku a partisipá na e evento...

Nos tin nos Reina Seú 2019, pabien na Denise Janga i e sobrá finalistanan...

E evento a keda organisá na Boca Samí i e pueblo di Boca a keda masha kontentu ku e eskoho...

Mi ta masha interesá kon a bai ku e kontròl di uso di alkohòl ku Polisnan a tene djasabra anochi...

Segun mi nan a sera kaya muchu tempran i esaki por tabatin influensia riba e asistensia na eventonan ku a tuma lugá den e área di Saliña..

Ata Grupo Rítmiko Caribenses a pidi Fundashon Kultural Seú Kòrsou e puntuashon di nan presentashon...

Nan ke informashon i segun mi Fundashon Kultural Seú Kòrsou no tin bon regla kon e pidimentu di puntuashon tin ku tuma lugá...

No mester tuma e kaso aki komo un ku no meresé atenshon...

Kaminda tin partisipashon den un festival bo mester tene kuenta ku tin posibilidat ku un partisipante òf agrupashon musikal lo pidi puntuashon si dado kaso nan no ta kontentu ku e resultado òf si nan ke evaluá nan presentashon pa siña for di esaki...

Esaki mesora ta mustra bu tambe ku e kompetensia den e festival di Kantadó Mayó ta algu serio...

Ta keda Fundashon Kultural Seú Kòrsou pa nan solushoná e situashon ku a presentá i pa otro aña pèrkurá ku nan reglanan di partisipashon ta bon definí i pa nan sea publiká esaki òf duna kada agrupashon rítmiko ku na momentu ku nan inskribí kiko ta e reglanan dje festival...

Pa e desaroyo dje evento mester pèrkurá pa tur regla ta konosí i pa esun ku keda perhudiká (den sierto forma) sa ki proseso e mester enkaminá pa por haña aklarashon riba su kaso...

E siman di sine di CIFFR su benta di karchi a kuminsá djasabra último i mester bisa ku e públiko a reakshoná di un forma magnífiko...

E echo ku a superá e pre benta di añanan anterior ta indikashon kla ku e públiko lokal a brasa e festival di sine tene duru...

Djárason awó e siman di CIFFR ta kuminsá i nos ta pendiente pa kompartí ku bo e diferente aktividatnan ku tin relashoná ku e evento ku no ta e pelíkulanan so...

Pa loke ta trata e temporada di Seú 2019 e siman aki tin 2 aktividat..

Elekshon di Rei i Reina Kultural ta tuma lugá djadumingu awor den Klup di Shell i Elekshon Wela Seú ku ta tuma lugá den Hòfi Sterke Yerke tambe djadumingu atardi...

Nos tei move, siman a kuminsá, ban traha pa adelanto di nos Pais !...

Te djárason ku Dios ke!...