Un felis djabièrnè pa tur nos lektornan...

Nos a yega otro wikènt...

E wikènt aki ta eligí Wela Seú i tambe ei i Reina Kultural, dos elekshon distinto pero riba mesun dia i na un sitio diferente...

Wela Seú ta tuma lugá na Hofi Sterke Yerke, miéntras ku Rei i Reina Kultura ta tuma lugá na Klup di Shell...

Djadumingu awor ta e fecha final tambe di e festival di sine di CIFFR...

Un éksito un biaha mas pa e festival di sine ku diferente pelíkula ‘sold out’...

Públiko amante di sine sigur ta disfrutando dje diferente pelíkulanan ku a keda skohé pa pasa e siman aki...

Nos ta pendiente tambe pa mañan tende ken ta ganadó di e prestigioso premio Yellow Robin Award, premio ku ta keda otorgá na e ganadó dje kompetensia di pelíkulanan ku a inskribí pa partisipá den CIFFR...

Pietermaai tambe ta den preparashon pa otro siman ta e sentro di atenshon pa loke ta trata e evento musikal di Curaçao International Blueseas Festival...

E festival aki ta tuma lugá riba dianan 19 i 20 di aprel...

Manera kustumber lo tin diferente tarima den e área di Pietermaai kaminda lo tin presentashon di artistanan lokal i internashonal...

Djadumingu awor tambe ta fecha pa e selebrashon di 10 aniversario di Grupo Sablika den Club Union Boneriano...

Nan tin un tremendo selebrashon hinká den otro ku presentashon di diferente agrupashonnan rítmiko...

Si kultura ta den bo, wak pa djadumingu bo ta den Club Boneriano pa bo selebrá huntu ku Sablika...

Mama pa Semper ta e konsierto ku Randal Corsen i Dibo Doran tin pendiente pa presentá pa Dia di Mama...

Ayera tardi nan tabatin un rueda di prensa kaminda a divulgá detayenan dje evento...

Awe bo por lesa mas dje evento aki DEN BEMBE...

Promotornan a kuminsá ta yena e kalènder di aktividatnan pa 2019...

Ma tuma nota ku e género di músika Urbano tantu lokal komo internashonal tei haña su atenshon...

Nòmber di un artista urbano internashonal ku ta bastante pegá den Latino Amérika ta menshoná...

Tei laga e promotornan kaba di konkretisá tur kos pa djei nos anunsiá esaki...

Obranan teatral e aña aki tambe tei pèrkurá pa atraé públiko ...

Nos a tuma nota di algun obra kómiko ku ta pendiente pa keda presentá, anto esaki ta sin lubidá esnan ku ta keda produsí i presentá pa artistanan individual...

Nos artistanan lokal ta produsí basta, ta keda na nos komo públiko pa duna sosten na kada un ora ku nan presentá nan obra pa públiko...

Djasabra tin e show di baile Indio ‘Yaadein’ ku lo tuma lugá den e ouditorio di WTC...

Lo tin 2 show, un 4 or di atardi i e otro 8 or di anochi...

Mi tei move, djaluna mi tei bek ku otro edishon di ‘Louie Louie’...