Un bon siman na nos lektornan...

Ayera nochi e selebrashon di Sablika tabata kargá ku hopi ambiente...

Ken di ku gruponan rítmiko no por pone ambiente?...

E videonan di ayera ta papia un palabra kla, e gruponan sa kon animá i e públiko ta biba ku e ambiente ku ta keda presentá pa diferente dje gruponan rítmiko...

Awe tin rueda di prensa dje selebrashon di 50 aniversario den farándula di Melvin Landburg...

Pa mañan nos ta pendiente di duna bu mas informashon riba esaki...

Elekshon Wela Seú tabatin bon ambiente, e públiko ku a bin sostené e kandidatanan a animá nan partisipante faborito...

Pabien na e organisashon i na sra. Tuitt Fullinck ku a resultá Wela Seú 2019...

Nos a tuma nota ku ayera tardi Gio a toka na vèlt di Heintje Kool i nan a logra di atraé un bon públiko na e evento...

Bai bèk na e kustumbernan di ántes i laga e públiko skucha e banda ta e mihó desishon...

Konsistensia tei pone ku e banda por kue kaya tene bèk ku 2 man...

Elekshon di Rei i Reina Kultural a tuma muchu tempu ayera pa yega na resultado, esaki a pone ku nos ta pendiente pa mañan kompartí e resultado i fotonan ku nos lektornan...

Fundashon Karnaval di Bándabou a regla premio pa su embahadornan...

Ainda falta pa kubri gastunan di animashon musikal durante dje dos marchanan ku tabatin na Bándabou...

Mi ta spera ku Gobièrnu ta duna un aporte èkstra na tantu FKBB i tambe Fundashon JAG pa nan por kaba di kubri e gastunan relashoná ku organisashon di aktividatnan di Karnaval...

Nos semper a bisa ku si bo sa delantá ku e evento ta un ku su budget huntu ta superá i mion florin, e aporte di Gobièrnu mester yega e montante ei...

Ta e selebrashon kultural di mas grandi ku ta keda propagá den eksterior i ku Gobièrnu mester duna su aporte na esaki...

Ku mester bini un kontròl estrikto riba gastunan ku ta keda hasë mi ta di akuerdo, pero nan mester ta konsiente ku pa organisá kos bon i manera ku Gobièrnu ke tin gastunan mará na esaki...

E 2 organisashonnan no ta e únikonan ku a yega di haña nan den problema finansiero despues di organisashon di Karnaval, ta diferente tin ku durante dje último añanan a bai resultá den e problema aki...

Pa aworakí mi ta kere mester kubri e gastunan i kuminsá prepará mesora pa e selebrashon grandi di 50 aniversario di nos Karnaval...

Pa 50 mester di mas fondo pa por organisá un selebrashon di kita sombré i na e nivel promoshonal internashonal...

Ban wak si Gobièrnu ta logra sea via di e kompanianan di Gobièrnu pa saka e montante ku tin mester ...

Nos tei move, djárason nos tei bèk ku otro edishon di “Louie Louie”...

Bon siman !