Un felis djárason na tur nos lektornan...

Awe EXTRA ta kompartí ku bo informashon relashoná ku International BlueSeas Festival ku ta tuma lugá e djabièrnè i djasabra aki den e distrito di Pietermaai...

E área di Pietermaai lo ta karga ku públiko riba e dos dianan dje festival ku presentashon di artistanan internashonal na diferente punto stratégiko den Pietermaai...

E festival di músika Blues ku presentashon di artistanan grátis a bira un atrakshon pa e fin di siman Santu...

Temporada di Seú tambe ta yegando su klímaks ku djaluna otro siman e Marcha di Seú 2019...

Nos ta pendiente pa risibí e lista di gruponan partisipante...

Moveshonnan den farándula ta tumando lugá ketu bai...

Tin músiko pendiente pa tuma desishon i hala kita...

E medley ‘Homenahe na Eddy Mar’ ku Juni Juliet a produsí a kai den masha bon tera...

Diferente ta e músikonan ku a apresiá e produkshon aki di Juni i ta spera ku mas ta e músikonan ku lo sa di pone nos músikonan di pasado den spòtlait dor di bolbe graba nan kansionnan pa dje forma ei rebibá nos músika lokal...

Esaki ta meskos ku e proyekto ‘Nos Rais Musikal’ ku Instituto pa Formashon musikal a presentá aña pasá...

E reskate di nos músika mester tuma lugá...

Tin algun hende ku ta hasiendo tremendo trabou dor di warda i digitalisá nos músika di pasado...

Proyektonan manera ‘Nos Tesoro’ ta di gran balor i instansianan manera Archivo Nashonal mester hasi bon uso di e proyektonan aki pa tin den su kolekshon nos músika lokal...

Pa ami tur aña nos mester pone sea un kompositor òf kantante den spòtlait...

E aña aki músika di kai òrgel a risibí e atenshon i asina bo mester sigui pa mantené nos músika bibu...

Produkshon nobo ta oké, pero nos pasado musikal tambe mester keda konservá...

Papiando di músika di Kai Orgel, nos mester elogiá e inisiativa di Sentro Kultural Kòrsou i Sentro di Detenshon i Korekshon Kòrsou pa e proyekto di Kai òrgel...

Lanta e interes bou di prezunan pa no solamente siña kon pa traha e kaha di òrgel, pero tambe lanta nan interes musikal pa siña kon ta pone músika riba bari...

Músika ta relahá bo mente i un proyekto asina den prisòn ta yuda e músiko tambe pa e distraí su mente, siña algu di nos kultura i desaroyá su talentonan...

Mi ta interesá pa wak e presentashon di Gio e wikènt aki den ‘Sugar’...

E banda djadumingu pasa a duna un presentashon den Stadion na Heintje Kool i a atraé un bon públiko...

Bebedónan a lèn e bar den lat i organisadó dje evento tabata masha kontentu ku Bar a bende bon...

Nos tei move, aworakí ta te otro siman djárason nos lo tei bèk...

Bai trankil e dianan aki...