Un felis djárason pa tur nos lektornan...

Kon a bai ke wikènt di Semana Santa...

Hopi aktividat rònt Kòrsou i ounke situashon ta wanta, bo ta tuma nota ku pueblo no a keda kas pero a skohe pa sali i dibertí...

Curaçao International BlueSeas Festival su di 4 edishon a resultá un éksito kompletu den Pietermaai...

Un públiko ku sigur a surpasá 3 mil hende a disfrutá ámbos anochi dje festival...

Esaki tabata otro evento di Fundashon Bon Intenshon i su brandingpartner MCB pa 2019, awor tur hende ta pendiente pa e anunsio di e artistanan ku falta pa Curaçao North Sea Jazz Festival...

No lubidá tambe riba Festival di Pueblo riba 2 di yüli 2019...

Marcha di Seú 2019 tabata bunita...

E piesa ganadó di Kantadó Mayó ‘Na pia me’ a zona hopi bon den e marcha...

E kansion komponé pa Furgell Wijngaarden i Doña Elia Isenia a bira un éksito i ta tantu na koreografia a keda prepará i presentá pa gruponan ku a partisipá na e marcha...

Furgell, Doña Elia, Kantadó Mayó 2019 Adjatay i Orírí mester ta hopi kontentu ku e impakto di ‘Na pia Me’...

Un punto ku si mester hasi menshon di dje pa loke ta trata e marcha ta e echo ku tabatin diferente grupo ku a yega lat i a brua e numerashon, loke a hasi sigur pa e plantanan di televishon masha difísil pa por a hasi un presentashon kompletu...

Esaki sigur ta di lamentá i segun mi tòg no ta algu ku sa ta kustumber den Marcha di Seú...

Otro kos ta e spit di djèt ku e marcha tabatin...

Mi no sa si ta Polis òf ta e organisashon mes a pèrkurá pa ranka e marcha...

Lidernan di grupo rabiá a ventilá nan opinion riba esaki riba retnan sosial...

E impreshon sigur tabata ku lo por a kaba e marcha un tiki mas lat i laga e partisipantenan disfrutá mas durante dje marcha...

E dos puntonan aki sigur mester bin dilanti durante di evaluashon...

Awor nos ta pendiente pa otro siman e ‘Marcha di Simadan’ i ‘Marcha di Bándabou’...

E presentashon di Gio ku Lele i Djuric den ‘Sugar’ a resultá den un tremendo fiesta kaminda fanátikonan di Gio sigur a disfrutá i rebibá momentunan inolvidabel ...

Lele i Djuric den historia di Gio indudablemente ta un duo ku tabatin hopi éksito i ku ketu bai ta atraé públiko pa nan presentashon...

Gio su motor a start, e banda ta den studio di grabashon i loke ta importante ku nan tin un agènda ku a kuminsá yena ku presentashon...

Pe wikènt ku ta na kaminda tin diferente aktividat pendiente...

Un di nan ku lo bai hala atenshon ta e ‘Gala di Bolero 2’ ku presentashon di Wladimir Lozano na Kòrsou...

Esei ta djadumingu awor, 28 di aprel den PWFC...

Aktividatnan sosial pendiente ta e ‘Food Festival’ den Rust & Burgh...

Por último e selebrashon di 37 aña di ERA djasabra awor na Landhuis Brievengat lo bira e fiesta popular di wikènt aki...

Nos tei move, djabièrnè nos tei bèk!...