Un felis djabièrnè pa tur nos lektornan...

Wikènt di masha hopi aktividat i Dia di Rei ku tambe ta pèrkurá pa hala un kantidat grandi di públiko pa Punda...

Empresanan tambe ta probechá i pone spesialnan riba Dia di Rei pa dje forma ei logra atraé kumpradó i di mes mas entrada pa nan empresa...

Awe nochi Shirma Rouse ta presentá den Pietermaai na Miles...

Su fanátikonan lokal tin e chèns úniko di presensia e presentashon di un gran kantante...

Djasabra na Sentro di Bario Sta. Maria tin e workshop di instrumènt trahá for di material di resiklahe...

E evento ta kuminsá for di 11 or di mainta i ta terminá 7 or...

Pa 3 or di atardi tin e workshop di traha instrumènt...

Si bo yu tin talento musikal, pasa kuné lag’é tira un bista i si e gusta, inskribí serka Omar Sling pa e forma parti dje proyekto...

Grupo E he he tin bendementu di ‘Dream Catchers’ mañan dilanti di Palasio di Gobernadó...

For di despues di Gran Marcha ta masha hopi hende tabata interesá den un ‘Dream Catcher’ i e grupo a traha un kantidat pa bende komo aktividat pa rekoudá fondo...

Bai tempran pasó ta yen hende ke un ‘Dream Catcher’...

ERA su selebrashon tambe ta mañan anochi na Landhuis Brievengat...

Un banda ku un trayektoria largu i ku un grupo grandi di fanátiko...

Djasabra i Djadumingu na Rust & Burgh tin e Food & Fiesta Festival, un aktividat pa famia kaminda bo por bai dibertí for di 11 or di mainta te anochi lat...

Icons a biaha ayera pa Ulanda e banda e último dianan aki a pone algun piesa popular ku su kantantenan a yega di graba den pasado riba retnan sosial...

E piesanan sigur ta kontribuí pa ora ku e banda kuminsá ku su presentashonnan lokal...

Tur hende ta pendiente si pa kosnan nobo tambe kuminsá zona...

‘Curaçao Kandans & Zouk Revival 2019’ ta mustra di bai bira algu great...

E evento tin tur ingrediente pa bira un bon fiesta, awó ta promoshon tei konta...

Nos ta pendiente tambe pa otro siman e evento di Curaçao International Airport kaminda nan tin un openhouse i posibilidat pa ‘tour’ den e airport...

Ma komprondé ayera ku e interes pa ‘tour’ den e airport ta asina haltu ku nan mester a hinka un ‘tour’ mas pa por komplasé e demanda...

By the way ba skucha e duo di Randal Corsen i Dibo Doran ku e vershon jazzy di ‘Kòrsou ta den su Gloria’?...

Busk’é pa bo skuch’é, tremendo e ta zona i ta demostrá un biaha mas ku e duo dinámiko aki ta kreativo den tur sentido di palabra...

Nos tei move, disfrutá di bo wikènt i Dia di Rei...