Un bon siman pa tur nos lektornan...

Wikènt a pasa i ya nos a kuminsá haña un bista riba loke tres grupo di Karnaval tei presentá durante di Gran Marcha 2018...

Djabièrnè anochi Carnival Republic i Crazy Diamonds a presentá nan trahe, djasabra anochi a toka turno na Atanan Djingueli Duzjeni...

Awe bo ta mira e trahe di Carnival Republic i Atanan Djingueli Duzjeni, pa mañan mi ta kompartí esnan di Crazy Diamonds...

Tur e presentashonnan e tema sigur ta ken lo bai dirigí Karnaval 2018...

Aworakí tur hende ta pendiente pa Minister di Kultura pa hasi anunsio di esaki ora ku e komishon ku mester kaba di evaluá e kuater organisashonnan duna su konseho...

Awe nochi ta AMAK tei reuní riba Festival di Tumba 2018...

Nan a risibí algun oferta i awe nochi lo mester disidí ta kua proposishon lo mester bira esun ku miembronan di AMAK lo aseptá...

E konsierto di Junior Tecla i Rootsriders a resultá un éksito kompletu...

Riba 2 mil hende a presensiá e konsierto kaminda éksitonan di ‘Bob Marley’ a zona ...

Tabata un plaser pa por a presensiá e konsierto aki i tuma nota dje nivel di presentashon di nos artistanan lokal ku ta presentá rònt Europa ku e konsierto aki...

Ma tende ku tin músikonan di un banda ku durante wikènt ku ta tras di lomba lo mester a tuma e desishon ku nan no ta sigui mas ku e persona ku ta na kabes dje banda...

Parse ku relashon a daña entre e músikonan i e manager despues ku esaki a kuminsá di tuma un aktitut outoritario i ku pa ningun dje músikonan no ta aseptabel...

Palabra ta na e músikonan awor pa nan por tuma desishon, reorganisá mesora pa nan por sigui...

Tin un músiko lokal ku ta trahando riba produkshon musikal di un banda kompletamente di hende muhé ku próksimamente lo bai debutá aki na Kòrsou...

E banda ku ta formá pa músikonan venezolano ta ensayando na Venezuela i e músiko ku nos ta referí na dje a biaha pa Venezuela pa duna guia na e músikonan venezolano...

Ta parse ku e banda, kende ta den mesun konsepto ku entre otro ‘Ibiza’ lo ta pendiente pa algun presentashon den fin di aña...

Ma komprondé ku tin plan serio e aña aki pa sera frontera pa loke ta trata presentashon di agrupashonnan musikal for di otro pais aki na Kòrsou...

Ta parse ku e plan a lèk i tin un promotor ku ta man na kabes, pasó e banda ku e ta trahando kuné lo tin basta un par di presentashon na Kòrsou...

Lo ta interesante pa sa kiko tei sosodé...

Konforme e lei ku ta regardá presentashon di bandanan for di eksterior, no tin mag di tin presentashon den luna di desèmber...

Ban spera ku no ta otro situashon di ‘furia di masbangu’ ku ta hasi bochincha pa fin di aña, pero ku den luna di yanüari ta duna dispensashon...

Nos tei move, bon siman !...