Un bon siman...

Kòrsou tabatin un tremendo wikènt tras di lomba...

Masha hopi hende mes riba pia pa tantu e selebrashon di Dia di Rei komo diferente otro aktividatnan ku tabatin...

Punda a keda yen ku públiko pa loke ta trata e selebrashon di Dia di Rei...

Fo’i mainta tempran te den oranan lat di anochi e ambiente a sigui den tantu Punda, Otrobanda i e área di Pietermaai...

Sentro Komersial Sambil tambe tabata kargá ku hende ku a probechá di deskuento ku diferente dje tiendanan a ofresé...

Djasabra anochi e selebrashon di ERA tambe tabata tremendo...

Fanátikonan sigur a disfrutá dje selebrashon i bon músika ku a keda presentá...

Ayera tardi tabatin e fiesta di Bolero den PWFC tambe ku a hala bon públiko...

Bon presentashon un biaha mas di Karimbo ku a kompañá e kantantenan invitá i e invitado spesial Wladimir Lozano...

E siman aki ta un siman di kap na mochi, start djaluna, break djárason, sigui djaweps...

Na Ulanda tabatin 2 presentashon di Icons i mester bisa ku ámbos presentashon a bai bon!...

Bon komentario for di Ulanda pa loke ta trata presentashon dje banda ku ta pendiente awor pa hasi nan presentashon den format nobo aki na Kòrsou...

Prepará bu pa djadumingu awor e selebrashon di Simadan na Club Union Boneriano...

Ta konosí ku e selebrashon aki ta pèrkurá pa masha bon ambiente mes ...

Bailamentu di ka’i orgel na Muizenberg a bai bon tambe...

Amantenan di ka’i orgel a bishita e plenchi i disfrutá dje músika i demostrá nan arte den bailamentu di kaha...

Djabièrnè anochi nos tabata den Pietermaai i un biaha mas tabatin e oportunidat di disfrutá dje presentashon di Shirma Rouse...

Shirma ta klase aparte, su repertorio ta bon varia i e sa kon entretené su públiko...

Anto su fanátikonan, ta loko su tras, nan a gosa un bòl, kanta i baila...

Great ora bo haña e oportunidat pa presensia presentashon di un di bo artistanan lokal ku ta eksitoso na Ulanda...

Keep up the good work Shirma !...

Riba e mesun anochi nos a logra di mira parti dje presentashon di Edsel ‘Payo’ Juliet na Mundo Bizarro, ei tambe bon ambiente...

Payo ta toka ful baliabel i e públiko einan tambe tabata gosando dje músika presentá pa Payo...

E ambiente den Pietermaai tabata tremendo i nos ta kombensí ku mester wak e konsepto aki i pa introdusié podisé kada kuartal den un otro área na Kòrsou...

Meskos ke konsepto di Kaya Kaya, ta bon pa por ehèmpel Kas di Kultura usa e formato aki pa trese nos kultura mas serka dje pueblo...

Nos tei move, djárason ta liber, pues awor ta te djabièrnè próksimo...

Ounke e siman tin un break den dje, ban trabou ku ánimo na traha pe adelanto di nos Dushi Kòrsou!...