Wikènt a yega!

Poko poko pero sigur nos ta yegando na final di temporada di Seú...

Mayan djasabra tin e selebrashon di Simadan na Club Union Boneriano, promé ku esei tin e Marcha ku ta Sali for di pòmp di gasolin na Muizenberg pa 4.30 di atardi...

Djadumingu awó tin e Marcha di Seú di Bándabou i despues djei ta premiashon lo sigui dia 18 di mei...

E marcha di Seú di Bándabou ta stail di esun ku yega promé ta bai, e numerashon di Pariba no ta konta na Bándabou...

Yega tempran pa bo bai promé òf den e proménan, bo yega lat, ta patras a sobra...

E idea aki ta pone ku tur vehíkulo lo buska moda di yega tempran pa no bai kai den lat...

E wikènt aki tin diferente konsierto tumando lugá...

Konsierto di Gospel di Jurgen La Cruz i su amigunan...

Konsierto pa selebrashon di 50 aniversario den farándula di Melvin Landburg...

Konsierto di Kor Guadalupana, djasabra i djadumingu den ouditorio di Banko Sentral...

Ma tuma nota ayera ku e banda musikal K’ribe a logra un kontrakt i lo ta presentando tur djaweps den Riffort Village...

Pabien na Renan i su tim, e ta duna Riffort Village tambe un fecha mas ku músika bibu, loke sigur ta bon pa nos músikonan lokal...

Pa e públiko ku ta bai wak Marcha di Seú na Bándabou, kòrda ku e marcha ta Sali 1’or di mèrdia, kemen yega trempan...

Awe ma komprondé ku for di djárason tin hende a bai marka tereno na Barber pa nan por sinta i wak e Marcha di Seu.. 

Hendenan a Sali foi Pariba, bai Barber pa sigurá nan espasio pa wak nan Seú...

E situashon riba e barku Freewinds tin hopi hende preokupá...

Ta basta hende tin ku e último 2 biahanan ku e barku a hasi bishita na Kòrsou ku a bishita esaki pa presensia e tradishonal konsiertonan riba djamars anochi...

Na Aruba tambe nan ta preokupá pe mesun motibu...

Aki e departamento GMN di Gobièrnu a tuma medidanan kaba i ta bai duna vakuna na tripulashon i a keda pa saka un komunikado pa pone esnan ku a bishita e barku na altura di kiko nan lo tin ku hasi...

E malesa di sarampi ta un plaga na sigur New York kaminda diferente skol ta konfrontando un epidemia di esaki...

Si na chikí ba pasa e angua, na grandi aki bo tin ku dal un ‘boost’ atrobe pa fortifiká bo imunidat pa e malesa...

Ba ripara ku tur banda ta tokando éksitonan di pasado i niun hende ainda no a los un kansion nobo pa 2019...

Kustumber ta ku ta produsí i presentá esaki den final di kuaresma...

E aña aki tur hende a bai bek den tempu i no a produsí nada nobo ainda...

Nos tei move, disfrutá di bo wikènt!