Un felis djabièrnè pa tur nos lektornan...

Ayera organisadónan a anunsiá ‘Curaçao Reggae Festival’...

E line up di artistanan ta mustra interesante sigur pa siguidónan di e género di Reggae...

Great pa tuma nota ku tin banda lokal presentando den e evento, Junior Tecla, Uprising Band i Rasta Farley...

Un presentashon riba video pa duna un impreshon kon nan ta bai dekorá Festival Center tambe a keda presentá, fo’i entrada lo bo ripará e diferensia...

Djadumingu awor ta fecha pa e festival di basilon di Sablika...

Un total di 8 kantante basilon tei presentá den loke tei bira un anochi di hilaridat ku teksto di piesanan eksistente kambia i kantantenan ku ta riba un basilon kompletu...

E evento aki a pone mi kòrda riba e grupo di Karnaval ‘Pa pasa 1 Pret’ ku den pasado tabatin e tipo di festivalnan aki ku masha éksito...

E komedia ‘Ta Kwa’ ku a keda presentá djárason último den Teatro Luna Blou a dal masha bon mes...

Ainda e grupo no a anunsiá ki dia lo tin e próksimo presentashon ...

E wikènt aki Gigo Martinez ta na Boneiru ku algun presentashon...

Un pabien na nos lektornan boneriano ku selebrashon di ‘Dia di Boneiru’...

Awe nochi den Club Union Boneriano lo tin selebrashon, entrada ta grátis...

Ma tuma nota ku un par di músiko ku ta forma parti di Kuerpo Polisial a uni i a lanta un banda...

Awe nochi nan tin un presentashon den sirkulo sera...

Nos ta pendiente pa wak kiko te intenshon ke banda aki...

Un kos ta sigur e organisashon ku e aña aki ta organisá e tradishonal ‘Korpsweek’ sigur lo hasi uso dje banda aki durante di nan aktividatnan...

Ounke e situashon ta no ta masha di kanta makamba, tòg mi ta tumando nota ku tin diferente empresa ku ta pendiente pa habri nan porta òf ku resientemente a habri nan porta...

Great pa tuma nota ku empresarionan ta sigui invertí den Kòrsou i loke ta importante pa músikonan ta e echo ku e músikonan ku ta presentá komo solista, sea ku instrumènt òf kantando ku pista ta hañando mas lugá pa presentá...

Ayera nochi Punda tabata karga ku públiko pa e evento di tur djaweps ‘Punda Vibes’...

E echo ku e futbolistanan miembro di nos selekshon nashonal tambe tabata den Punda a atraé mas públiko pa e okashon aki...

Pa e bida nokturno na Kòrsou por sigui krese mester tin variashon den loke ta keda presentá...

Hopi te músikonan ku a bira konsiente di esaki i ta prepará nan mes pa por hasi presentashon pa diferente tipo di públiko...

Esaki ta pone ku e ta habri porta pa nan por presentá na diferente lokalidat riba nos isla...

Nos tei move, disfrutá di bo wikènt, tin basta aktividat e wikènt aki ...

Sali dibertí, pero kòrda gosa na midi!

Felis wikènt...