Shonnan un bon siman...

Despues di algun dia di ousensia nos tei bèk...

Siman di Kultura a kuminsá i un dje eventonan ku sigur a hala atenshon djasabra atardi tabata e festival di baile folklóriko organisá pa SKOBA riba Brionplein...

Tremendo espektákulo di baile a keda presentá...

Nos bailenan ta sigur algu ku mester keda mantené i esaki ta presis loke e organisashon ta hasiendo...

Ata músikonan di NAME a topa otro djasabra último i nan ta kla pa harma e banda bek pa presentashon den desèmber i yanüari próksimo...

Un dje bandanan ku nos tabata pendiente pa un presentashon di nan tabata Frank & Friends...

Nan presentashon a keda kanselá...

Ayera nos a risibí informashon ku fiesta di djasabra awor na Villa Royal na Skalo a keda kanselá...

Tur hende ku a kumpra karchi na Beep Beep Rio i 24 uur uit de muur por bai tuma nan sèn bèk...

Na Aruba e promé edishon di Casibari Jazz Festival a resultá un éksito...

Di Kòrsou a presentá Randal Corsen i un formashon musikal ku partisipashon di kantantenan, Tania Kross i Dibo Doran...

E siman aki ta siman di Kultura i e meta pa e aña aki ta pa ‘Ban Selebrá Herensia i Honra Kreatividat’...

Ayera nan a start ku un konferensia na Sambil...

Normalmente nos a kustumbrá ku ta habri e siman ku un presentashon musikal, pero Kas di Kultura a kambia e kustumber i presentá un konsepto nobo...

Ban wak kiko mas lo tin e siman aki, loke ta sigur ta ku diferente empresa ta pone atenshon na e siman dor di ofresé nos pasabokanan na kliente...

Bendedónan di kos dushi ta biba e siman aki...

Inskripshon pa Bos di Kunuku ku Rei i Reina Kultural a habri...

Tuma kontakto ku Shurendi Pieternella pa mas informashon...

Aña pasá nos a bishitá e festival di ‘Bos di Kunuku’ i nos a gosa un bòl...

E festival tin tur ingrediente pa sigui krese i esei e organisashon mester traha riba dje...

Eventonan kultural meresé tur atenshon aki na Kòrsou...

Ora bo ke traha riba ‘Nation Building’, bo mester bai bèk bo rais i konstruí bo pais for di einan...

Ma tuma nota ku Izaline Calister ta pendiente pa un konsierto na Kòrsou...

Izaline tin su públiko ku tur biaha ku e presentá na Kòrsou ta sostené e artista su presentashonnan...

Juni Juliet tambe ta pendiente pa un presentashon den fin di aña ku ‘The Legends’...

Nos ta pendiente pa e promé presentashon di diferente banda nobo aki na Kòrsou...

Ma tuma nota di algun kantante i músiko ku ta presentá style di ‘freelance’ ku tur formashon musikal ku ke pa nan forma parti di dje...

E pregunta lo bira ta ken tin privilegio riba sobra na momentu ku bo tin 2 òf mas presentashon riba mesun anochi? ...

Of ta stail di ‘jump in’ e músikonan aki ta bai presentá? ...

Ta kestion di buska un shofùr pa kore di fiesta pa fiesta, p’asina kumpli i tene tur hende kontentu...

Nos tei move, un siman produktivo na trabou !...