Un felis djárason...

Nos ta den Siman di Kultura i tin diferente aktividatnan sosial tumando lugá...

Awe mes ‘DEN E BEMBE’ tin algun evento ku ta tuma lugá e siman aki...

Mayornan di alumnonan di Mgr. Niewindt College na Mundu Nobo ta keda invitá pa sostené e proyekto kultural ku ta tumando lugá e siman aki...

Yuda kontribuí pa duna e muchanan ánimo pa partisipá na proyektonan kultural/ edukativo ...

Tin 2 fiesta di e siman aki ku a kanselá, públiko a kuminsá skohe nan fiesta ku nan ta bai i si loke bo tei presentá no ta masha atraktivo, nan no ta bai!...

Esaki ta un indikashon ku promotornan mester bai tene na kuenta na momentu ku nan ta pone fiesta, paso bo ta invertí promoshoná e fiesta pero si e no tin un toke apart i ta atraktivo, públiko ta laga bo kos para...

Ma komprondé ku un dje bandanan ku mester toka a pone un preis ku e promotor no por a kumpli kuné...

Fiestanan di kòmbèk tambe ta sinti e efekto, esaki debí ku aworakí na mi konsepto tin demasiado banda den e género di kòmbèk i esnan mas popular sigur lo pone kondishon pa presentá ku esnan ku resultá di ta mas suak...

Bo ripará ku tur hende ke pone fiesta ku sigur 3 banda den e kombinashon pa dje forma ei sera kaya pa sobrá organisadó di fiesta...

E kreashon di loke por ser yamá ‘kartel vorming’ lo bira masha peligroso den nos farándula...

Temporada di Aguinaldo i Tambú tambe ta na kaminda...

Poko dia ei un radio emisora a lòs kansion di Pasku kaba...

Aworakí nos ta pendiente pa Sherman Antonia lòs ‘Papa ta Liesje’ di Doble R pa nos sa sigur ku fin di aña ta na kaminda...

Músikonan ku ta toka nan so, presentando músika pa entretené anochi na restorantnan ta hañando mas kaminda pa presentá...

Nan tambe ta logrando pa penetrá pa hasi presentashon na diferente restorant ....

P’esei tin biaha ora bisa ku nos no tin bida nokturno, no ta semper mi ta di akuerdo ku e pensamentu...

Tin basta moveshon musikal tumando lugá, ta kestion pa bo sa presis unda tin animashon musikal pa bo sali i bai disfrutá...

E desaroyo ku ta pendiente pa bai tuma lugá den sentro di siudat i área di Pietermaai lo duna aun mas realse na e bida nokturno...

Si rebibá Punda, Skalo i Otrobanda lo ta un logro masha grandi...

E proyekto ta den tapara, ehekushon lo sòru pa un ‘boost’ ekonómiko ...

Nos músikonan mester ta kreativo pa logra saka mas probecho di e posibilidatnan ku tin riba e merkado aworakí...

Nos tei move, djabièrnè nos tei bèk...

Ban biba nos Kultura!...