Un bon siman pa tur nos lektornan...

Siman di Kultura ta tras di lomba...

Kiko e siman aki a trese pa nos?...

‘Louie Louie’ ta kere ku mester evaluá e selebrashon di Siman di Kultura pa saka afó kiko nos a logra i ke sigui logra kuné...

Pa loke ta trata músika i kustumbernan lokal, mester pone pa selebrá esaki durante di 1 siman di aña? ...

Tin hopi punto ku mester evaluá pa dje forma ei nos sa unda nos ta para i kiko nos ke logra ku selebrashon di Siman di Kultura...

Ku eksepshon di algun skol ku nos a tuma nota ku a dediká atenshon na e tema, e selebrashon ta mas den direkshon di kome kuminda krioyo i pasa boka krioyo i gosa di músika...

E edukashon ku mester tin tras di esaki, e ta tumando lugá? ...

Kiko bo ta pensa ku pa por krea patriotismo, nos mester dediká atenshon durante henter aña na nos kultura...

Nos mester stòp di pone temporada pa aktividatnan kultural...

Mi ta di akuerdo ku bo mester wanta Karnaval por ehèmpel den un temporada, pero su músika no mag di ser warda pa sobra di aña ...

Meskos ta e komposishonnan di Seú ku ta bini bek despues di e Marcha na Bándabou te den sèptèmber na momentu ku ta selebrá Siman di Kultura...

Na mi opinion e piesanan ku tin tema general mester por sigui toka durante di henter aña...

Un kalènder kultural ku énfasis riba edukashon mester ser traha pa bo keda mantené e hubentut embolbí den Kultura...

Asina tin hopi punto mas ku meresé atenshon si nos ke sigui propagá patriotismo...

E agrupashon musikal ‘Excellence’ ta zona bon, nos no a duda den esei, awor e trabou duru tei start pa prepará pa nan presentashon ofisial...

Crazy Diamonds ta e promé grupo ku a presentá su trahe pa Karnaval 2020...

For di ayera ya tin algun grupo mas ku a pone fecha pa nan presentashon di trahe...

Oktober i kuminsamentu di novèmber lo ta kargá ku presentashon di trahenan di Karnaval...

Kondolensia na famianan di sra. Vilma Lourens, un ferviente fanátiko di Festival di Tumba ku a fayesé den wikènt ku ta tras di lomba...

Falta di músikonan pa sekshon di brass ta pone ku e praktikamente niun dje músikonan ku ta supladó no ta tokando pa solamente 1 agrupashon musikal...

Pa sobrebibí den e merkado, e músikonan aki ta keda kontratá riba un base ‘freelance’ pa presentá ku bandanan...

Mi tin gana di sa kon lo bai para ku e bandanan ku ta stens pa den fin di aña e supladónan aki ta disponibel pa toka pa nan...

Pasó si su agènda yega i abo no a ‘book’ fecha ainda, bo ta den problema...

Farándula no ta duna tampoko pa aworakí, bo importá supladó pa hasi e trabou, debí ku no tin entrada pa paga e gastunan mará na esaki...

Nos tei move, djárason nos tei bèk...

Un bon siman, ban traha pa Kòrsou!...