Un felis djárason, awe tur hende ta kontentu paso mañan ta liber...

Aktividatnan ta kuminsa for di awe i ta basta kaminda di bai tin e dianan aki...

Nos a tende di un aktividat ku tin plania den Punda relashona ku 10-10-10, pero tog no a tuma nota dje promoshon di esaki...

Promoshon e dianan aki ta e palabra magiko...

Ayera un promotor tabata grawata su kabes, paso e tin un tremendo aktividat, pero te ainda e publiko no a kuminsa reakshona manera e ke, benta manera a para bira kustumber ta kue spit riba dia di evento, loke ta pone promotornan pasa susto, prome ku nan por ta trankil anochi ora ku e evento kuminsa...

Un musiko/ kantante tin biaha tambe ta ekspresa su mes di forma ku bo no ta kere...

Ayera nos a tende di un kantante ku no por a kontene su emoshon na momentu ku ela skucha e areglo di un piesa ku nan a dune...

Ela emoshona i bira super kontentu paso ela sinti kaba ku ta un eksito grandi e kompositor i areglista a dune pa graba...

Bandanan ta den studio di grabashon, produktornan musikal ta druk e dianan aki preparando pa fin di aña...

Piesanan nobo mester zona pa bandanan por yena nan agenda ku presentashon...

Ma tuma nota di un informashon di Fundashon di Karnaval di Banda Bou kaminda nan ta duna splikashon riba algun punto ...

Pa ‘Louie Louie’ e komunikado aki no tabata apto pa keda publika i nos a prefera pa no hasi esaki...

No ta tur biaha ora bo ta keda tilda di algu, bo mester reakshona, pero ya, tur hende tin nan punto kaminda nan ta bisa ta basta!...

Skempi ku Top 30 na radio, bon proyekto pa sigui promove nos artistanan lokal...

Ma tuma nota di algun potret hopi bunita di nos Miss Universe Curaçao 2019, Kyrsha Attaf ku a keda saka pa un fotografo Fadil Berisha...

Kyrsha ta den ful preparashon i espektativa ta haltu pa su partisipashon na Miss Universe...

Situashon ta di atenshon pa Fundashon Kas di Kultura, parse ku nan mester sali for dje edifisio ku nan ta okupa den Skalo, pero no por drenta esun na Otrobanda, paso esei segun informashon no ta apto pa personal por traha den dje...

A keda ketu, pero mester yega na un sitio pa ubika e personal...

E dianan aki ta drechamentu di baiskel tin, djadumingu awor e parada mas grandi di baiskel na Korsou, ‘Tour de Mas’ lo ta riba kaya...

E parada anual di baiskel ta atrae un kantidat grandi di koredo di baiskel i basta hende kantu di kaya pa disfruta dje parada...

Nos tei move, djabierne nos tei bek ku otro edishon di ‘Louie Louie’...