Un felis djárason pa tur nos lektornan..

Tanten nos ta pendiente di Orkan Irma na Islariba, trabou ta na òrdu di dia na islanan ABC...

Nos tur ku tin sea famia, amigu òf konosí ta pendiente di Irma i su ruman Jose ku ta djis den bògt ei...

Pa esnan ku no a yega di eksperensiá un orkan òf e loke ta keda atras ora ku un orkan pasa, bo no tin e sentimentu berdadero di kiko e situashon ta...

Nos ta bendishoná aki na Kòrsou, Aruba i Boneiru, djis wak kon ‘Harvey’ a pasa i kiko el a bai bira na Texas...

Ban spera lo mihó pa St. Maarten, Saba i Statia, paso ora bo haña un katástrofe manera Orkan Irma e pais ta bolbe bai atras i e periodo di rekuperashon ta tuma su tempu...

Esaki tabata djis un tiki di e kombibensia ku nos amigu, famia i konosínan ku ta eksperensiando Orkan Irma...

Ban bèk pa farándula, AMAK a anunsiá ku djaluna awor nan reunion ta sigui pa 7’or di anochi ku òf sin kuórem...

Ta di lamentá ku pa tantísimo biaha reunionnan di AMAK ta keda posponé pa falta di asistensia di miembronan...

Dia di inskripshon pa Festival di Tumba, tur hende tei, meskos ora e siman kaba tur hende ta kore tras di Hildo Manuela ku Feco pa haña chèk...

Sin konta tur esnan ku tin reklamo despues ku anunsiá e finalistanan i resultado final di Festival di Tumba...

Ora di presentá na reunion nan no tei, pero ora di kobra i habri boka reklamá si nan ta ‘eerste rij, eerste bank’...

Bèrgwensa pa un organisashon ora ku e tipo di situashonnan aki ta presentá...

Ku ki kara AMAK por bai mesa ku posibel spònsernan i bai buska niun akuerdo pa sera si nan no tin sosten di miembronan na momentu di negoshá...

Ta miembronan mester duna e organisashon un mandato i esaki mester sosodé durante di reunion general...

Djaluna awor, wak pa sala Newborn Patricks ta yen ...

Ayera dos kansion nobo a keda poné riba merkado, e promé di Ray Lauffer ku ta zona masha bon mes...

E proyekto aki di Ray ta algu ku mester tene kuenta kuné...

ERA indudablemente a dal un ‘grandslam’ ku e kansion ‘Ta nèt mi kos’...

Un piesa komersial ku un tremendo areglo i ku tei pone e banda den spòtlait atrobe...

Awe ora e piesa kuminsá zona na radio bo tei ripará mesora e reakshon ku esaki ta bai haña...

Mi tei bolbe mira Layo kana hari su so...

Ayera Color Events a anunsiá nan konsierto ‘Furia Latina’ ku presentashon di Ozuna i Plan B...

E konsierto aki tei mustra di bira un kos grandi, basta interes di parti di fanátikonan pa e presentashon di Ozuna...

Keda pendiente pa e anunsio di artistanan lokal ku lo bai presentá durante dje evento...

Nos tei move, tabata un plaser pa produsí otro edishon di ‘Louie Louie’, te djabièrnè ku Dios ke!.