Wikènt a yega, e dia liber di ayera a hera pone mi yama bu awe un bon siman...

E fiestanan di djárason a bai bon segun ma komprondé...

No tur manera a spera, pero e loke a sorprendé ta esun ku segun pronóstiko lo tabata ménos bendí a ‘sold out’...

Bandanan a kuminsá saka nan produkshonnan pa fin di aña...

GIO a saka 1 nobo i segun ma komprondé e final dje piesa ta e introdukshon di un siguiente piesa ku pronto T-zar lo lansa ku GIO...

E piesa a pone mi kòrda riba e pelíkulanan di Avengers ku nan final ta indiká kontinuashon di e siguiente edishon...

Gibi Doran tambe ta den studio di grabashon pendiente pa saka un produkshon nobo...

E piesa lo ta bai forma parti dje repertorio di GIO...

Pa e konsepto ‘Kings of Hits’ nan ta pendiente tambe pa saka un piesa ku lo keda kantá pa diferente kantante ku tei presentá e aña aki den e di 2 edishon di ‘Kings of Hits’...

Mañan djasabra ta fecha pa e elekshon di Reina Prens i Pancho pa grupo Paraiso Hubenil...

E evento ta tuma lugá na Sentro di Bario Otrobanda i ta kuminsá pa 6 or di atardi...

Wikènt aki ta ‘Tour de Mas’ te evento ku lo bai hala atenshon djadumingu awor...

Un representante di e organisashon di Karnaval di Coro, Estado Falcón na Venezuela tabata di bishita na Kòrsou durante di wikènt ...

El a reuní ku Fundashon JAG i ta pendiente pa un kolaborashon entre e 2 organisashonnan...

Invitashon pa bai Coro a keda entrega i petishon pa partisipá den Gran Marcha a keda hasi...

Ban wak kiko lo ta e resultado...

Na Aruba a sali e informashon ku Fakkeloptocht lo tuma lugá na Sanicolas, esaki sin ku e organisashon SMAC a informá ofisialmente...

Awor no esei no ta basta, riba facebook nos por a sigui e diskushon i tin personanan ku ke pa SMAC organisá un marcha di despedida na Aruba pa evitá ku e Karnaval di Aruba ta kaba riba e djadumingu di Parada di Playa...

Nan remarke ta ku tur hende i te asta banda ta biaha pa Kòrsou pa aki bin disfrutá i partisipá den nos Marcha di Despedida...

Ora bo wak e medaya di dos banda, bo ta tuma nota ku for di Kòrsou tin masha hende ku ta biaha bai Aruba pa spesialmente e ‘fakkeloptocht’, lagando apertura di Karnaval aki na Kòrsou atras...

Tur e dos aktividatnan aki ta atraé públiko for dje islanan i esei ta algu ku mester komprondé, e ambiente di fakkel na Aruba ta algu úniko, meskos te kaso ku nos Marcha di Despedida ku ta algu spesial pa e Rubiano bin disfrutá...

Pa otro siman tur informashon di e skedjel di Karnaval di Aruba lo bira konosí...

Aki na Kòrsou ma komprondé ku ta djárason otro siman Fundashon JAG lo tene su rueda di prensa pa informá riba tur detaye relashon ku Karnaval 2020...

Disfrutá di bo wikènt, nos tei bek Djaluna ku otro edishon di ‘Louie Louie’...