Un felis djárason na tur nos lektornan...

Ban spera ku e situashon di instabilidat ku a surgi ayera nochi lo por terminá pa nos tin trankilidat den nos pais...

Den farándula tin yen di situashon di preokupashon, promotornan a skohe pa tuma un posishon di ‘sinta mira’ i evitá ku nan ta pone nan sèn na peliger ku organisashon di fiestanan ku no tin un seguridat ku tin chèns pa gana plaka...

E márgen di tuma riesgo a bira mas chikí, pasó tur hende ta skohe praktikamente e mesun fechanan i esei ta trese kuné ku bo ta drenta un guera pa wak ken ta sobrebibí...

Den wikènt ku ta tras di lomba esaki tabata bisto...

Ma tende ku te asta e promotornan tabata plania pa a bai organisá un evento huntu, pero despues e webu a chòk! i kada ken a skohe nan rumbo...

Na final di anochi, un a bai bon, e otro ménos bon!...

Ayera nochi ma tuma nota ku Junior Tecla a anunsiá riba facebook ku e no ta presentando mas den e konsierto di reggae ku próksimamente ta bai tuma lugá...

Ku e anunsio aki mi ta kòrda e sentimentu di ‘Déjàvu’ ku un músiko a bisa mi ora ku el a mira e poster dje konsierto di Reggae...

Awor e evento di dos dia a bira 1 dia i mi ta kere ku ta na su lugá pa e promotor sali i duna splikashon dje kambionan ku ta tumando lugá ku e evento, pasó si e no hasi esaki lo e por tin konsekuensia pa su evento...

E konsepto ta un bon, pero si tin artistanan ku a kai afó, mester indiká fo’i tempran kiko ta e situashon...

E evento di WOKE tabata un éksito...

E promé edishon a bai bon, awor mester sigui traha riba konsientisashon di nos artistanan lokal pa uni na e proyekto aki ku no solamente lo yuda alsa e nivel, pero via di ‘TrackDrip’ ta duna bu e posibilidat pa laga bo muzik zona den eksterior...

Pa esnan ku ta traha ku intenshon pa un dia subi riba e tarima internashonal, bo no por keda drai den chikí...

E banda Excellence lo tin su debut dia 27 próksimo...

E echo ku e banda ta skohe un lugá públiko pa laga skucha su músika ta un bon idea...

Nan mester pèrkurá pa invitá gruponan ku pa nan ta di interes pa bin skucha e banda pa dje forma ei por logra presentashonnan den e último dos lunanan di 2019...

Ma tuma nota di un fecha den novèmber kaminda tin 2 evento riba mesun dia, kaminda e públiko ta praktikamente e mesun públiko, ta di wak ken ta bai impreshoná mas ku e otro...

Nos tei move, djabièrnè nos tei bèk!...