Un felis djabièrnè, wikènt a yega i segun mi tin biaha mesun lihé ke yega e ta bai tambe, un djis ta djaluna atrobe!...

Ayera Fundashon JAG a tene su rueda di prensa pa anunsiá nan aktividatnan pa temporada di Karnaval 2020...

Na inisio dje rueda di prensa Fundashon JAG den persona di sra. Glenda Aniceta a anunsiá ku Fundashon JAG debidamente a kumpli ku entrega di relatonan finansiero di 2018 i 2019 ku esaki refutando e informashonnan eróneo ku tabata sirkulá riba retnan sosial e último simannan...

Sra. Lisette Sambo Velder, direktor di sektor di Kultura i Deporte na su turno a konfirmá esaki tambe i a splika kon bin a duna konseho positivo na Minister pa laga JAG mes organisá Karnaval 2020...

Pa nos ku esaki e splikashon ta duna i nos lo sigui pa òrdu di dia...

Great pa tuma nota ku e kalènder tin algun aktividat nobo i ku a skohe pa kambia e apertura di Karnaval...

E konsierto ku Burning Flames, Kevin Little i Krosfyah pa e amante di músika Karibense lo ta un ku sigur bo no tin mag di pèrdè...

Mi ta kere ku JAG lo mester hasi hopi promoshon pa logra kapta e atenshon di hubentut pa e evento aki...

Mi pensamentu ta ku semper bo mester sòru pa e artista internashonal ku bo ta trese ta pèrkurá pa un ‘cross over’ pa loke ta trata e públiko, pa tantu grandi i hóben, asistí...

Tin diferente pais ku a konfirmá partisipashon di un grupo di Karnaval na nos Gran Marcha ...

Pabien na Stanley Ignacio ku a keda nombra komo ‘Baluarte di Karnaval 2020’, meskos tambe na Ofisina di Turismo ku ta duna un aporte grandísimo na desaroyo internashonal di nos Karnaval...

Djadumingu awor ‘Alo Loco’ tin presentashon di nan trahe pa Karnaval 2020...

Tin hopi espektativa pa nan presentashon di trahe ku lo tuma lugá na Landhuis Brakkeput...

E kompetensia entre e eventonan ‘Kings of Hits’ i ‘Chimbala’ lo bai bira algu interesante...

Ken lo logra pa atraé e públiko na nan evento?...

Ounke mi ta kere ku tin ‘airu’ pa tur hende, pero nan ta riba praktikamente mesun tipo di públiko...

Meskos ku e dos eventonan aki tin mas fecha kaminda eventonan bon ta krusa otro i ku un lo sufri den e kaso aki...

Tin biaha bo por evitá, pero ta bira difísil na momentu ku kada promotor ta sigur ku nan evento lo produsí ganashi pa nan...

Ayera Fundashon JAG a anunsiá ku lo tin ‘dranghek’ for di Cubaweg pa final di Marcha...

Pa 2021 e intenshon ta ku lo tin ‘dranghek’ for di salida te final...

Nos tei move, disfrutá di bo wikènt!...

Djaluna nos tei bek ku otro edishon di Louie Louie...