Siman a parti na dos aki...

Espektativa ta haltu pa e presentashon di trahe di ViseVèrsa mañan djaweps...

E sitio den kurason di Otrobanda ta mustra di ta un lugá ideal pa un presentashon...

E doño dje lugá tambe tei haña un bon promoshon pa su lugá...

Diskushon riba retnan sosial pa loke ta trata e kontrolnan ku a tuma lugá den wikènt tras di lomba nèt na momentunan ‘hot’ dje negoshi...

Nan tin un punto ei, pero tin biaha e kontròl mester tuma lugá den e ora ei pa bo por detektá kosnan fo’i òrdu...

Esun tin derechi di hasi e kontròl, pero e otro tambe tin derechi di duna su komentario pa e ora ku a skohe pa bai kontrolá...

Kontròl ta nesesario pa mantené tur kos den balansa...

Si bo no a kumpra bo karchi pa bai wak ‘Chimbala’, un rekomendashon bai kumpra lihé...

Ma komprondé ku karchinan ta kasi ‘sold out’, un tremendo reakshon pa un evento ku ta tuma lugá aki 1 luna...

Temporada di fin di aña a dal aden i ántayera anochi ma tuma nota di un produkshon nobo di ‘Los Cariñitos All Star Curaçao’ titulá ‘Jobida di Bendishon’...

Tremendo produkshon ku meresé mas atenshon na radionan...

Un produkshon lokal di Angelo ‘Borrel’ Dopwell den e género di gaita ku ta zona realmente bon i ku tremendo letra...

Kos bon ta kos di gaba!...

E montuno nobo ku Gibi Doran a graba ku GIO ta zona bon, e letra tambe ta papia palabra kla...

VivaKids Recycleband a produsí un kansion nobo, tremendo proyekto ku meresé sosten di komunidat...

Sling i e tim di Viva Kids ta hasiendo un tremendo trabou ...

Miss Teen Curaçao International ta tuma lugá djasabra awor...

Gionel i su tim ta trahando duru pa nan brinda un tremendo espektákulo...

E evento lo keda transmití pa Televishon Direct...

E entrevista ku Roel Calister ku a keda publiká djamars ta muestra di ora un músiko ta kere den su produkshon ku no ta importá kuantu tempu tuma pa hasi esaki...

Importante ta pa e produkto final ta loke bo ke i ne momentu ku bo sinti ku ta ora pa estrená esaki bo hasié...

Menasa i Calister a dura dos aña promé ku nan tabata kla ku e produkshon, for di momentu di idea, konsepto, grabashon i awor lansamentu di ‘Banana’...

Ma kombersá ayera ku Feco Gomes, presidente di AMAK, nan ta pendiente pa medio novèmber nan tene un rueda di prensa relashoná ku Festival di Tumba 2020...

E organisashon ta trahando duru pa e di 50 edishon di Festival di Tumba i ta kombensí ku nan tin un tremendo espektákulo prepará pa pueblo di Kòrsou...

Nos tei move, djabièrnè tin otro edishon di ‘Louie Louie’...

Nos ta topa!