Un felis djabièrnè, wikènt a yega...

Ayera nochi e ‘Fábrika di Ambiente’, Vise Vèrsa a presentá nan trahe di Karnaval pa 2020...

Sneu tei kai den Gran Marcha...

Gentz a bolbe impreshoná ku nan animashon ayera nochi...

‘By the way’, e sitio kaminda e presentashon di trahe a tuma lugá a habri wowo di algun promotor...

E área di Ser’i Otrobanda ta birando atraktivo...

Ta e desaroyo den e bario mester kana bon i nan mester kuida e produkto ku nan tin pa alsa no solamente e kalidat di bida den e bario, pero tambe krea mas desaroyo komersial...

Awe tardi Fundashon Bon Intenshon tei presentá e relato di e impakto finansiero di Curaçao North Sea Jazz Festival den ekonomia di Kòrsou...

Dr. Robertico ‘Tico’ Croes di Rosen College of Hospitality Management  ta e persona ku lo ta enkargá pa hasi e presentashon ...

Mañan ta fecha pa e sertámen di Miss Teen Curaçao International...

Pa e sertámen aki tambe tin basta interes...

Gobièrnu a duna pèrmit pa dos emisora bai den aire...

E frekuensianan 90.3 i 90.9 ta esnan ku a bira disponibel i House of Worship huntu ku Jave Station di Francis Knepa a keda skohé komo e doñonan di e frekuensianan...

Ma komprondé ku Jave Station lo bai den aire pa 1e di novèmber i House of Worship ta pendiente pa fin di yanüari 2020 nan bai den aire...

Ku e dos radioemisoranan nobo Kòrsou ta yega na un total di 27 emisora riba e pida baranka aki!...

E agrupashon musikal Excellence lo tin su debut djadumingu awor den Riffort Village...

E debut lo start pa 7 or di anochi i e banda lo presentá un repertorio variá...

Tin un banda nobo ku ‘Louie Louie’ ta pendiente pa bai skucha nan ensayo den wikènt aki...

Músikonan hóben ta sinta studia merkado i krea nan formashon musikal ku nan ta mira tin espasio pa entretené públiko ...

Nos ta pendiente tambe pa e apertura di temporada di Aguinaldo i Tambú...

Kas di Kultura tin e tradishon di organisá e eventonan aki, mi ta spera ku pa otro siman tin mas informashon riba esaki...

Kon tei para ku dekorashon den kaya i riba rotòndenan pa loke ta trata e fin di aña aki...

Mi tin e impreshon ku mester traha un budget di gastunan i wak kon por haña spònser pa adoptá e rotòndenan, nan ta pone nan bòrchi propaganda i ta kubri e gastunan di dekorashon i iluminashon ...

Wikènt di kòrta maishi, fo’i ayera tardi yen hende ku kara kontentu, awe sobrá ta kuminsá hari i nan lo drenta fin di siman kontentu...

Nos tei move, djaluna otro edishon di ‘Louie Louie’, disfrutá di bo wikènt!...