Un bon siman pa tur nos lektornan...

Wikènt p’esnan ku ta kòrta maishi a bai bon...

Basta moveshon riba kaya ku diferente aktividat ku a tuma lugá...

Pabien na Gionel Virginie ku su sertámen di Miss Teen...

Bon reakshon riba e sertámen, sigui asina...

Ayera mèrdia mi tabata invitá pa mira e promé presentashon di e banda nobo ‘NOVO’ ku tabata pa invitadonan i prensa...

E banda tin un repertorio varia, ta konta ku un sekshon di brass di 2 trompèt i 1 trombon i ta bou di direkshon musikal di Cedric ‘Cheche’ Langguth...

E konsepto ta bon, nos tei pa sostené nos músikonan lokal...

Ayera nochi a toka turno na ‘Excellence’ pa hasi su debut na Riffort Village...

E banda a duna un bon presentashon i ta tokando realmente na nivel, loke tabata di spera mirando ku ta hóbennan ku a pasa den e proseso di formashon musikal di Instituto pa Formashon Musikal...

Karnaval ta djis den bògt ei i ayera nochi ‘Hats off to Dreams’, e grupo di aña 2019 su presentashon di trahe a dal masha duru mes...

No solamente na kantidat di públiko ku a bai wak e presentashon pero tambe na e manera ku esaki a keda organisá...

E forma di presentashon a pèrkurá pa kada partisipante ‘bende’ e trahe ku nan a presentá i ta duna e públiko e chèns pa por apresio e trahenan bon...

E show a keda bon hinká den otro i mester aploudí esaki...

Pabien na HOTD ku nan “HOTDCouture’ pa selebrashon di 50 aña di Karnaval...

Di loke ku a keda presentá te ku aworakí, otro aña nos Karnaval lo ta realmente di fiesta, nèchi i hopi bunita...

Tin mas grupo ku ta pendiente pa nan presentashon di trahe...

E siman aki ta ‘Estreno Mas Pikete’ ta na turno...

Nan presentashon di trahe lo tuma lugá djadumingu awor, 3 di novèmber 2019 den Riffort Village...

Presentashon di trahe lo kuminsá pa 7 or di anochi...

Wak pa bo tei trempan pasó e lugá ta yena mané kustumber...

E loke ku mi a premirá ku ta bai pasa a sosodé...

No a pone sèn disponibel pa Kas di Kultura por organisá e apertura di temporada di Aguinaldo i Tambú...

E disputa ku tin entre Sektor di Kultura i Deporte ku Kas di Kultura ta yegando su punto kulminante i un ora pa otro bo por spera un desishon ku ta para e relashon di trabou...

E punto aki ta riba mesa algun tempu kaba, pero a manera want’e i awor tòg bo ta mirando ku esaki ta na kaminda mirando kon e maneho i òf desishonnan ku ta wòrdu tumá...

Ban spera ku por yega na un solushon pa e situashon...

Aworakí no ta e momentu pa kòrta den eventonan públiko ku ta duna e komunidat e chèns pa por relahá nan mente un ratu...

E situashon no ta di kanta makamba pero mester ta kreativo pa atendé ku kustumbernan di e pueblo...

Un bon siman pa bo nos kerido lektor, nos tei drenta otro siman kaminda Kòrsou mester di e union pa nos bai dilanti!...