Un felis djabièrnè na tur nos lektornan...

Kon nos ta pe wikènt aki?...

ERA i Doble R ta na Ulanda e wikènt aki i di informashon ku Louie Louie a risibí ta indiká ku benta di karchi a bai hopi bon...

E fiesta ta un evento pa rekoudá fondo pa Fundashon JAG...

Ma komprondé ku e banda Doble R lo tin Arnel Salsbach riba piano...

Segun informashon Doble lo ta sufriendo di kebrante di salu i esaki a pone ku e no a biaha pa Ulanda...

E konsierto di Reggae ku mester a tuma lugá e wikènt aki a keda posponé...

Riba retnan sosial por a mira e anunsio kompañá ku informashon pa esnan ku a kumpra karchi ku nan por bai buska nan sèn na puntonan di benta...

Ta un lástima ku e organisadó mester a kanselá e konsierto, e no a duna detaye, pero mi ta kere ku tur hende por komprondé ku e ‘line up’ di artista no a atraé masha hende pa kumpra karchi...

Organisá evento ta un rísiko, pero ora bo analisá i yega na konklushon ku bo ta bai pèrdè sèn i tin biaha hopi sèn ta mihó bo benta sèrbètè blanku den ring...

Ku kanselashon dje evento bo ta keda pèrdí di no solamente e sèn ku bo a invertí, pero tambe hopi dia di preparashon...

Spònsernan tambe ta hala pia despues di esaki fo’i bo, loke ta hasi super difísil pa bo organisá un otro evento grandi si nan no tin konfiansa mas den e proyekto ku bo ta bai presentá...

Mañan djasabra grupo di Karnaval Hubenil ‘Yupi’ lo tin nan di 9 jump in...

E jumpin ta tuma lugá den Club Sugar i lo tin animashon musikal di Dolce Band i Gio...

E tema dje aña aki ta ‘Sende bo lus pa Karnaval 2020’...

Pa karchi por yama 518-3752 òf 521-2115 ...

Apertura dje temporada di Tambú ta tuma lugá mañan 6 or ...

For di 6 or di atardi lo tin presentashon di diferente grupo di tambú riba Plasa Brion...

Amantenan por bai fo’i tempran pa sigur un lugá pa nan por sinta disfrutá na momentu ku kueru ronka i chapi spat kandela...

Djadumingu ta turno pa e Apertura di temporada di Aguinaldo i Gaita...

E presentashon di gruponan di aguinaldo lo kuminsá pa 5 or di atardi...

Djadumingu awor e área di Otrobanda lo ta kargá ku outo...

Riba Plasa Brion tin músika di Aguinaldo, miéntras ku lo tin un interes grandi pa presensia e demostrashon di trahe di Estreno Mas Pikete...

Estreno Mas Pikete su presentashon di trahe lo tuma lugá pa 7 or di anochi den Riffort Village i espektativa ta ku e Fòrti na Otrobanda lo yena te basha abou...

Disfrutá di bo wikènt, dibertí na un manera sano i nos ta topa djaluna ku Dios ke!...