Un felis djabièrnè, nos tei ku otro edishon di LOUIE LOUIE...

E situashon na St. Maarten ta horibel, anto awor ‘Jose’ ta na kaminda pa e islanan mañan...

Aki na Kòrsou kalor ta na òrdu di dia...

Awor te hasta anochi e uso di èrko a pone ku Aqualectra a hañ’é den problema ku suministro di koriente ayera nochi...

Tur hende ta baña tempran, sende èrko...

Siman pasá djabièrnè Crazy Diamonds a tene nan presentashon di trahe di Karnaval i awe nos ta kompartí esaki ku nos lektornan...

Nan ta pendiente pa nan tremendo barbekiú ku lo tuma lugá dia 29 di sèptèmber awor...

Aña pasá e tabata un éksito i pe aña aki nan tei ripití...

Lions Club ta pendiente pa un tremendo ‘Lions Beer Fest’ ku tei tuma lugá dia 6 di òktober próksimo...

Amantenan di serbes i esnan ku gusta bon ambiente prepará pa bai gosa i na mes momentu kontribuí na e proyektonan di Lions Club...

E organisashon a duna di konosé ku nan tambe lo bai duna aporte na e damnifikadonan di Orkan Irma na Islariba...

Liane Bonofacio, promé finalista Miss Kòrsou 2017 a sali ayera pa Ecuador kaminda e ta bai partisipá den e sertámen di ‘Miss United Continents 2017’...

Eksito na Liane, nos ta kombensí ku bo ta un digno representante...

For di kuminsamentu di aña tabatin e informashon ku Rich Kalash i Izaline Calister lo a kolaborá i graba un kansion...

Ayera esaki a keda anunsiá ofisialmente i awor tur hende tin chèns di skucha e tremendo produkshon di e dos artistanan lokal...

Ma tende ku tin un promotor ku a aserká un organisashon ku a pone aktividat den mesun wikènt kuné i a bisa e organisashon ku si nan ke pa nan aktividat sigui mester kontribuí ku 40 mil florin pa nan laga e fecha bai...

Den e kos ei tin algu ku mi no a komprondé...

Si bo mes no tin pèrmit ainda ta kon bo ta hasiendo negoshi ku e pèrmit ku lo bo tin ku haña di gobièrnu?...

Na algun okashon mi a tuma nota di tipo di moveshonnan asin’aki di promotornan ku sa ku nan evento ta suak, pero ta lanta tene na otro organisashon ku si ke pa nan evento tuma lugá...

Ban serio, sea bo ta keda ku bo pèrmit i organisá bo aktividat òf bo ta informá gobièrnu ku bo no ta organisá bo evento mas...

Laga e otro kana su kaminda di krus i no bin ku niun oferta lukrativo pa laga e fecha lòs...

Un saludo pa Feco Gomes ku ta pendiente pa su miembronan presentá djaluna awor na e reunion ku AMAK a yama...

Djaki un invitashon atrobe na e miembronan pa asistí i dje forma ei yuda e organisashon yega na desishonnan importante pa adelanto di Festival di Tumba ...

Nos tei move, e kolumna a manera yena lihé...

Djaluna nos tei bèk. Disfrutá di bo wikènt i ban spera ku ‘Jose’ lo no okashoná mas daño na St. Maarten, Saba i St. Eustatius...