Un bon siman na nos lektornan...

Luna di novèmber a dal aden aki i e ambiente di fin di aña tei kuminsá manifestá su mes...

Uniko kos ku mi a komprondé ku ainda no tin desishon riba dje ta e dekòr den sentro di siudat pa loke ta trata fin di aña...

Ayera nochi ma chèk ku un persona ku ta serka na henter e asuntu di dekorashon i el a indiká ku ainda niun kontakto no a keda hasí pa e sa ku tin dekorashon e fin di aña aki...

Ami ta kere ku e dekorashon ta algu masha importante pa bo duna e pueblo algu pa nan por a sali i dibertí, bishitá Punda i Otrobanda durante di oranan di anochi...

I no lubidá ku e rotòndenan tambe ta haña un dekorashon ku ta alsa henter e sentimentu di fin di aña...

Pa loke ta trata fiestanan ya kaba algun a keda anunsiá ...

Kòrsou tin un grupo di Karnaval nobo ‘Glitzy Carnival Group’...

Ayera nan a presentá nan trahe ‘Heaven on Earth’, chèk e potrètnan ...

Estreno Mas Pikete ayera a bolbe ‘sold out’ Riffort Village, esaki djis pa bo komprondé ku ta tur kaminda den fòrti tabatin hende para pa wak e presentashon di e trahe...

‘The Golden Age of Egypt’ ta e tema ku nan ta bai presentá den Karnaval 2020...

Ayera a bira konosí tambe ku e grupo lo bai Karnaval ku animashon di Cache Royale i ‘Poke’ lo ta e artista invitá...

Djasabra anochi tabatin e apertura di temporada di Tambú riba Plasa Brion...

Ma spera mas públiko presente pa mira i disfrutá dje presentashon di e gruponan...

Ayera si e públiko riba Plasa Brion tabata mas tantu i nan a gosa sigur dje presentashon di diferente dje grupo nan di Gaita i Aguinaldo ku a presentá...

Awor ku tabatin e apertura, Gobiernu, mihó bisá, Sektor di Kultura mester sondia e posibilidatnan pa tur siman por pone tokamentu di sea grupo di tambú òf aguinaldo riba Plasa Brion...

Esei ta yuda trese un tiki mas e tradishon di selebrashon di fin di aña na Kòrsou...

Mi ta bai bek pa e presentashon di djabièrnè atardi di e impakto ekonómiko di Curaçao North Sea Jazz 2019 na Kòrsou...

E echo ku a bende mas ku 5 mil karchi internashonal ta un indikashon ku e promoshon internashonal ta halando públiko pa e festival...

Awor ta mas kamber mester bira disponibel pa dje forma ei e festival por sigui krese...

Otro punto ku tambe ta masha importante ta e interes lokal ku mester keda haltu, paso nos komo públiko lokal ta hunga un ròl importante den kontinuashon dje evento...

E punto aki tambe a bin dilanti durante di e presentashon di Dr. Robertico ‘Tico’ Croes ...

Ainda no a disidí si lo tin e di 10 edishon di CNSJF...

Durante dje rueda di prensa, Jan Willem Luyken, kabesante di MOJO Concerts, partner di Fundashon Bon Intenshon a indiká ku ta na mesa ainda pa diskutí e kontinuashon di e festival...

Nos tei move, djárason nos tei bèk!...