Un felis djárason pa tur nos lektornan...

Nos a yega na mitar di siman...

Mas i mas nos ta tumando nota di eventonan i fiestanan ku tei tuma lugá den luna di desèmber...

Awe nochi AMAK tin reunion i un dje puntonan riba e agènda ta e protekshon di merkado den luna di desèmber i temporada di Karnaval...

Lo ta interesante pa sa ki posishon músikonan lokal lo tuma den e kaso aki...

Ultimo añanan Gobièrnu a duna dispensashon pa esaki...

Mirando e interes general ku tin pa loke ta trata entretenimentu riba nos isla mi ta duda ku lo pidi Gobièrnu awor si pa wanta porta sera!...

E lei ta prohibí e presentashon, pero fo’i dje promé aña despues ku un grupo di promotor a protesta riba e artíkulo aki den lei, tur aña ku a sigui Gobièrnu a duna dispensashon...

Awó ta interesante pa wak ki interes lo keda sirbí...

Paso si sera porta desèmber i temporada di Karnaval, un dje promé bandanan ku lo tin problema pa presentá na Kòrsou lo ta Buleria...

Buleria ta un atrakshon den desèmber, pero ta un partisipante na Festival di Tumba...

Apart, kuantu influensia e desishon na final dje reunion tin riba interes general di Kòrsou pa e temporada?...

Ta great ku ta diskutí durante di un reunion riba e punto aki, pero nos mester ta sinsero ku ta masha difísil den e tempu aki pa bo prohibí e presentashon di artistanan internashonal na Kòrsou...

Mayoria biaha e interes general ta pisa muchu mas tantu ku proposishon di un organisashon ...

Ban bòltu e blachi...

ICONS ta pendiente pa presentá ‘Night of History’ den fin di desèmber...

Otro produkshon musikal interesante ta esun di Randal Corsen i Dibo D...

Resientemente nan tabata na Ulanda i a hasi grabashon di un orkesta di kuerde, vio, cello ets...

‘Louie Louie’ ta masha interesá pa skucha un pida dje produkshon musikal aki...

E duo di Randal i Dibo ta un masha kreativo i kada bia ta demostrá ku ‘The Sky is The Limit’ pa loke ta trata produkshon musikal...

Great pa a tuma nota dje presentashon di Ephrem J na Argentina...

Nos artista, manera ma skibi den e artíkulo ta sigui hala atenshon internashonalmente...

Danki Dios ku na Kòrsou nos a kuminsá ta dun’é e atenshon ku e meresé tambe...

Ephrem J a kere den su proyekto ora ku el a start i awor e ta kosechando fruta poko poko...

Segun mi tin pais ku Ephrem J a presentá kaminda ku otro bachateronan no a logra di yega...

Su konsepto di bachata romántiko ta algu masha gusta...

Tin artista/ músiko ku no ta interesá di purba nan éksito riba merkado internashonal...

Esnan ku si ke hasi esaki meresé nos apoyo total na momentu ku nan dal e stap...

Djabièrnè ku Dios ke nos tei bèk!... Felis dia!!!